Athugið þessi frétt er meira en 10 mánaða gömul.

Dýrið framlag Íslands til Óskarsverðlauna

Mynd með færslu
 Mynd: Go to sheep - RÚV

Dýrið framlag Íslands til Óskarsverðlauna

18.10.2021 - 12:42

Höfundar

Kvikmyndin Dýrið verður framlag Íslands til Óskarsverðlauna 2022.

Myndin var valin af dómnefnd Íslensku kvikmynda- og sjónvarpsakademíunnar, þar sem fulltrúar helstu fagfélaga íslenska kvikmyndaiðnaðarins, auk fulltrúa kvikmyndahúsa, gagnrýnenda og Kvikmyndamiðstöðvar Íslands sitja.

Leikstjóri Dýrsins er Valdimar Jóhannsson sem skrifar einnig handrit ásamt Sjón. Framleiðendur myndarinnar eru Hrönn Kristinsdóttir og Sara Nassim fyrir Go to Sheep og helstu leikarar eru Noomi Rapace, Hilmir Snær Guðnason, Björn Hlynur Haraldsson, og Ingvar E. Sigurðsson.

Myndin hefur verið sýnd víða um heim, á virtum kvikmyndahátíðum og í almennum sýningum. Á kvikmyndahátíðinni í Cannes hlaut hún verðlaun sem frumlegasta kvikmyndin í flokkinum Un certain regard og nýverið var hún valin besta myndin á kvikmyndahátíðinni Sitges á Spáni, auk þess sem Noomi Rapace fékk verðlaun fyrir leik í aðalhlutverk og Valdimar fyrir leikstjórn.

Dýrið fjallar um sauðfjárbændurnar Maríu (Noomi Rapace) og Ingvar (Hilmir Snær Guðnason) sem búa í fögrum en afskekktum dal. Þegar dularfull vera fæðist á bóndabænum ákveða þau að halda henni og ala upp sem sitt eigið afkvæmi. Vonin um nýja fjölskyldu færir þeim mikla hamingju um stund, hamingju sem verður þeim síðar að tortímingu.

Í umsögn dómnefndar segir meðal annars að frásögn myndarinnar sé sérlega heillandi og andrúmsloftið magnað, á mörkum raunsæis, hryllings og fantasíu.

„Myndmálið er sterkt og öll nálgun og efnistök einstaklega frumleg og áræðin. Frá fyrsta augnabliki er áhorfandinn fangaður og (dá-)leiddur gegnum dularfullt og spennandi ævintýri, en sagan er um leið nærgætin stúdía á mannlegt eðli, sorg og missi.“

Dómnefnd skipuðu: Dögg Mósesdóttir fyrir hönd Samtaka kvikmyndaleikstjóra, Júlíus Kemp fyrir hönd Samtaka íslenskra kvikmyndaframleiðenda, Margrét Örnólfsdóttir fyrir hönd Félags leikskálda og handritshöfunda, Christof Wehmeier fyrir hönd Kvikmyndamiðstöðvar Íslands, Ása Baldursdóttir frá Bíó Paradís, Þórarinn Þórarinsson kvikmyndagagnrýnandi, Víðir Sigurðsson kvikmyndatökumaður, Svana Jóhannsdóttir fyrir hönd Félags íslenskra leikara.

94. Óskarsverðlaunahátíðin verður haldin þann 27. mars 2022, en tilnefningar til verðlaunanna verða kynntar 8. febrúar 2022.

Tengdar fréttir

Kvikmyndir

Dýrið fyrst íslenskra mynda yfir milljón dali

Kvikmyndir

Dýrið í fimmta sæti á frumsýningardegi í Bandaríkjunum

Kvikmyndir

„Rætur mínar eru enn í íslenskum hraunbreiðum“

Pistlar

Lambið í barnaherberginu