Þetta sagði Ólafur Ragnar Grímsson, fyrrverandi forseti, þegar hann setti þing Hringborðs norðurslóða, Arctic Circle, í Hörpu í dag.
Í ræðu sinni sagði Ólafur Ragnar að það myndi skipta sköpum í baráttunni við loftslagsbreytingar á heimsvísu að vel tækist til á norðurslóðum. Hann þakkaði þátttakendum fyrir komuna og sagði ráðstefnuna lýðræðisvettvang þar sem fólki væru ekki settar skorður. Hann hvatti viðstadda til að spyrja ráðamenn knýjandi spurninga um aðgerðir í loftslagsmálum.
„En það þýðir að árangurinn af þessari ráðstefnu er í ykkar höndum,“ sagði Ólafur og beindi orðum sínum til gesta.
Fjöldi fyrirmenna tekur þátt í ráðstefnunni og má þar nefna Nicolu Sturgeon, fyrsta ráðherra Skota, Jeppe Kofod, utanríkisráðherra Danmerkur, Virginijus Sinkevicius umhverfisstjóra Evrópusambandsins, Jongmoon Choi, aðstoðarutanríkisráðherra Suður-Kóreu, og Bárð á Steig Nielsen, lögmann Færeyja auk tveggja öldungadeildarþingmanna í Bandaríkjunum.
