Mynd: EPA-EFE - NTB
Minnihlutastjórn sem getur ekki valið leikfélaga
Jonas Gahr Støre, leiðtogi norska Verkamannaflokksins og nýr forsætisráðherra Noregs kynnti ríkisstjórn sína í dag, í skugga voðaverkanna í Kongsberg í gærkvöld. Stjórnin verður minnihlutastjórn Verkamannaflokksins og Miðflokksins, vinstristjórn eftir átta ára valdatíð hægrimanna. Herdís Sigurgrímsdóttir, stjórnmálafræðingur sem býr í Stafangri í Noregi, segir að stjórnin eigi eftir að eiga erfitt með að koma málum gegnum þingið.
„Þau eru með 76 þingmenn samanlagt en þurfa 85 til að koma málum í gegnum stórþingið,“ sagði Herdís á Morgunvaktinni á Rás 1 í morgun.
Hún segir nýja stjórn leggja mesta áherslu á atvinnumál, byggðamál og loftslagsmál. Stjórnin ætlar meðal annars að breyta skattkerfinu, lækka skatta á tekjulága og hækka eignaskatt. Svo á að fjölga fæðingardeildum og lögreglustöðum á landsbyggðinni.
19 ráðherrar, þar af 10 konur
Jonas Gahr Støre, leiðtogi Verkamannaflokksins, verður forsætisráðherra og kynnti ríkisstjórn sína í morgun. Trygve Slagsvold Veldum, formaður Miðflokksins verður fjármálaráðherra. Alls verða ráðherrarnir 19, þar af 10 konur. Hadia Tajik, verður vinnumála- og aðlögunarráðherra fyrir Verkamannaflokkinn. Emilie Enger Mehl, Miðflokki, verður yngsti dómsmálaráðherra sögunnar, 28 ára gömul. Tonje Brenna verður menntamálaráðherra og Jan Christian Vestre, iðnaðarráðherra. Þau eru bæði úr Verkamannaflokkinum og voru í Útey þegar hryðjuverkin voru framin þar sumarið 2011.
Espen Barth Eide, Verkamannaflokki, verður loftslags- og umhverfisráðherra. Sandra Borch, Miðflokki, skipar embætti landbúnaðar- og matvælaráðherra, Annette Trettebergstuen fagnar því að vera komin í draumastarfið sem menningarmálaráðherra Verkamannaflokksins.
Verkamannaflokkurinn fær olíu- og orkumálaráðuneytið. Þar verður Marte Mjøs í ráðherrastólnum. Bjørn Arild Gram, Miðflokki verður sveitarstjórnarráðherra og loks verður Odd Roger Enoksen, Miðflokki, varnarmálaráðherra.
Betra að geta valið sér leikfélaga
Þrír flokkar geta aðstoðað stjórnina við að koma málum í gegn, Hægriflokkur Ernu Solberg, fráfarandi forsætisráðherra, Framfaraflokkurinn, sem er yst til hægri og Sósíalíski vinstriflokkurinn, systurflokkur Vinstri grænna. „Ef að stjórnin hefði haft einn þingmann í viðbót hefðu tveir aðrir flokkar getað tryggt þeim meirihluta, Rauðir yst til vinstri í þinginu og svo miðjuflokkurinn Venstre. Þá hefðu þeir getað skipt svona, og það er það sem minnihlutastjórnir vilja gjarnan gera, að velja sér leikfélaga eftir málaflokki,“ segir Herdís.
