Á ystu nöf á gígbarminum í Geldingadölum

11.10.2021 - 16:55
Mynd: Þyrluþjónusta Helo / Helo
Ferðalangur lagði sig í mikla hættu þegar hann gekk eftir örmjóum gígbarminum við eldfjallið í Geldingadölum fyrr í dag.

Þó að eldvirkni hafi legið niðri í rúmar þrjár vikur er ekki búið að lýsa yfir goslokum í Geldingadölum. Talsverður hiti er enn í hrauninu og hafa almannavarnir og lögreglan á Suðurnesjum ítrekað varað fólk við því að fara út á nýja hraunið því það sé óútreiknanlegt og stórhættulegt. 

Fyrr í haust sást hins vegar til manns á gígbarminum í vefmyndavél RÚV og í dag myndaði farþegi í útsýnisflugi á vegum Helo ferðaþjónustunnar annan ferðalang á þessum hættulegu slóðum eins og sjá má í meðfylgjandi myndskeiði.

Hjálmar Hallgrímsson, lögreglumaður á Suðurnesjum og forseti bæjarráðs í Grindavík sagði í samtali við fréttastofu að ekkert útkall eða tilkynning hefði borist til lögreglunnar á Suðurnesjum í dag vegna þessa.