Athugið þessi frétt er meira en 4 mánaða gömul.

Ekki færri íbúðir í byggingu í fjögur og hálft ár

Mynd með færslu
 Mynd: Hjalti Haraldsson - RÚV
Ekki hafa færri íbúðir verið í byggingu á höfuðborgarsvæðinu síðan í febrúar 2017. Haldi þessi þróun áfram mun íbúðaverð halda áfram að hækka. Þetta segir hagfræðingur Samtaka iðnaðarins sem segir ástæðuna fyrst og fremst lóðaskort.

Ekki hafa færri íbúðir verið í byggingu á höfuðborgarsvæðinu síðan í febrúar 2017. Haldi þessi þróun áfram mun íbúðaverð hækka áfram. Þetta segir hagfræðingur Samtaka iðnaðarins sem segir ástæðuna fyrst og fremst lóðaskort.

Nú eru tæplega 3.400 íbúðir í byggingu á höfuðborgarsvæðinu sem er 18% minna en á sama tíma í fyrra þegar þær voru rúmlega 4.100.

Þetta sýnir ný íbúðatalning Samtaka iðnaðarins. Mesti samdrátturinn er í Reykjavík, þar sem íbúðir í byggingu eru 24% færri, minnstur er hann í Kópavogi eða 10%, en þrjár af hverjum fjórum íbúðum í byggingu á svæðinu eru í þessum tveimur sveitarfélögum. 

Ingólfur Bender hagfræðingur Samtaka iðnaðarins segir að áhrif þessa gæti víða. „Þetta er talsverð breyting og ekki góð þróun. Það hefur verið vöntun á íbúðum á þessum markaði undanfarið, sem hefur verið að þrýsta upp verðinu talsvert og komið fram í aukinni verðbólgu og skilað inn þessum stýrivaxtahækkunum sem við höfum verið að sjá á þessu ári. Þannig að þetta kemur víða neikvætt fram,“ segir Ingólfur.

Hann segir að ástæður þessa séu nokkrar. „Kannski fyrst og fremst skortur á lóðaframboði. Við höfum fundið það hjá okkar félagsmönnum að þeir kvarta yfir því að það sé lítið framboð. Og það er helsti flöskuhálsinn í þessu.“

Haldi þessi þróun áfram - hvað þá? „Þá er líklegt að við sjáum áfram þessa þróun sem við höfum verið að sjá; framboðið af íbúðarhúsnæði er ekki að mæta þeirri eftirspurn sem er til staðar sem leiðir til þess að þrýsta verðinu upp enn frekar.“

annalth's picture
Anna Lilja Þórisdóttir