Dölli - ef Hið illa sigrar

Mynd: Dölli / Ef hið illa sigrar

Dölli - ef Hið illa sigrar

27.09.2021 - 17:45

Höfundar

Fyrir stuttu kom út platan - ef Hið Illa sigrar sem er tuttugu laga plata með frumsömdu efni frá Dölla. Þetta er sjötta sólóplata tónlistarmannsins Dölla sem hét fullu nafni Sölvi Jónsson en hann lést í febrúar í fyrra, fjörutíu og fimm ára gamall. Dölli hafði sent frá sér fimm plötur, þá fyrstu árið 2015.

Dölli hafði unnið að ef Hið illa sigrar um skeið þegar hann kvaddi þessa jarðvist. Platan er komin út fyrir tilstilli Róberts Arnar Hjálmtýssonar sem er líklega best þekktur sem Hljómsveitin Ég. Róbert var hægri hönd Dölla við upptökur plötunnar en Dölli er höfundur alls efnis, syngur og leikur á kassagítar. Róbert Örn lék á önnur hljóðfæri, annaðist útsetningar og hljóð- og eftirvinnslu plötunnar ásamt George Huxley.

Ef Hið Illa sigrar, sem er tuttugu laga plata eins og áður sagði, kom út í takmörkuðu upplagi á geisladiskaformi og það er hægt að nálgast hana í verslunum Lucky records, 12 tónum og Pennanum Eymundsson en allur ágóði af sölu hennar rennur til níu ára sonar Sölva.

Plata Dölla ef Hið illa sigrar er plata vikunnar á Rás 2 og verður spiluð í heild sinni eftir 10 fréttir í kvöld ásamt kynningum Róberts Arnars Hjálmtýssonar. Einnig verður hún aðgengileg í spilara.

Mynd með færslu
 Mynd: Dölli