Sigurður G. kærður til lögreglu, Persónuverndar og LMFÍ

24.09.2021 - 16:05
Mynd með færslu
 Mynd: RÚV
Þórhildur Gyða Arnarsdóttir, sem greindi frá árás og áreitni landsliðsmanns í knattspyrnu á skemmtistað fyrir fjórum árum, hefur kært lögmanninn Sigurð G. Guðjónsson til lögreglunnar á höfuðborgarsvæðinu, Persónuverndar og úrskurðarnefndar Lögmannafélags Íslands. Sigurður birti á Facebook-síðu sinni myndir af rannsóknargögnum úr sakamálinu sem var síðar fellt niður eftir að leikmaðurinn greiddi fyrir sátt í málinu.

Sigurður sagðist í samtali við fréttastofu ekki hafa séð kærurnar og hann hefði það fyrir reglu að tjá sig ekki um eitthvað sem hann hefði ekki séð.

Færslan sem Sigurður skrifaði á Facebook vakti nokkra athygli.  Þar birti hann gögn úr sakamáli sem tengdist kæru Þórhildar Gyðu og annarrar konur á hendur Kolbeini Sigþórssyni, landsliðsmanni í knattspyrnu. Málið var fellt niður eftir að Kolbeinn greiddi konunum fyrir sátt í málinu. 

Í viðtali við mbl.is í byrjun mánaðarins sagðist Sigurður vera orðinn þreyttur á því sem hann kallaði „atlögum í garð knattspyrnumanna og KSÍ. 

Í kæru sinni til lögreglu segir Gunnar Ingi Jóhannsson, lögmaður Þórhildar, að Sigurður hafi með færslu sinni misfarið með persónuupplýsingar og rannsóknargögn og brotið gegn friðhelgi einkalífs hennar. Þá hafi hann gerst brotlegur gegn lögum um þagnarskylduákvæði. 

Í kærunni er meðal annars vikið að því að Sigurður hafi haldið því fram að hann hafi birt gögnin sem einkapersónan Sigurður G. Guðjónsson. Það segir lögmaður Þórhildar að sé rangt. Sigurður hafi með þessu verið að reyna að koma sér undan trúnaðar-og þagnarskyldum og ábyrgð sem á honum hvíli samkvæmt lögum.

Þá er þess krafist að lögreglan kanni sérstaklega hvaðan Sigurður fékk gögnin en lögmaðurinn segir að leiða megi líkur að því að hann hafi fengið þau frá Kolbeini eða lögmanni hans. 

Í kærunni til Persónuverndar er Sigurður sakaður um að hafa brotið reglur með vinnslu persónuupplýsinga og gerst sekur um saknæma og ólögmæta háttsemi. Hann hafi ekki haft neina heimild til að vinna upplýsingarnar og hvað þá birta þær opinberlega.  Í þeirri kæru er bent á að Sigurður G. sé forseti dómstóla KSÍ og þiggi fyrir það laun og sé auk þess stjórnarmaður í félaginu Bakarameistarinn sem sé í eigu foreldra Kolbeins Sigþórssonar.

Í kærunni til úrskurðarnefndar Lögmannafélagsins er þess krafist að Sigurði verði veitt áminningu eða hann beittur strangari viðurlögum.  Þar kemur fram að 400 manns hafi sýnt viðbrögð við færslu Sigurðar, 90 hafi deilt henni og 800 ummæli verið skrifuð.

Lögmaður Þórhildar segir að færslan og birting gagnanna hafi haft þann tilgang einan að niðurlægja hana og villa um fyrir almenningi að hún hafi á einhvern hátt logið um málavexti. 

Yfirbragð færslunnar sé ljóst, þetta hafi verið tilraun til að niðurlægja Þórhildi og draga úr trúverðugleika hennar sem brotaþola í sakamáli „og um leið drusluskamma hana.“ Færslan hafi farið víða meðal almennings sem ekkert erindi átti með að sjá gögnin. 

Leiðrétting: Samkvæmt orðsendingu frá lögmanni Kolbeins greiddi leikmaðurinn fyrir sátt en í þeirri sátt fólst engin viðurkenning á sök.