Athugið þessi frétt er meira en 4 mánaða gömul.

Fimm smitaðir í Grímsey — Nær öll eyjan í sóttkví

17.08.2021 - 08:11
Mynd með færslu
 Mynd: RÚV - Ágúst Ólafsson
Fimm hafa greinst með kórónuveiruna í Grímsey en fyrstu tvö smitin greindust í síðustu viku og fóru nær allir á eyjunni í sóttkví í kjölfarið, ýmist í sjálfskipaða sóttkví eða formlega sóttkví. Karen Nótt Halldórsdóttir, íbúi í Grímsey, segir eyjuna hafa lamast í nokkra daga en nú sé sóttkví lokið hjá flestum.

Undanfarnir dagar hafa verið sérstakir í Grímsey en íbúar eyjunnar eru á bilinu 40 til 50 manns, að sögn Karenar. Smitin settu nokkrar skorður á lífið á eynni en loka þurfti verslun og veitingastað Grímseyjar á meðan á sóttkví stóð. Nú sé þá búið að opna verslunina á ný. 

„Við losnuðum úr sóttkví í gær. Við vorum skimuð á sunnudag en það kemur hingað læknir frá Akureyri á þriggja vikna fresti og hann var að koma með örvunarskammtinn fyrir okkur sem fengum Janssen-bóluefnið. Hann kom þá líka með græjur til að skima í leiðinni, “ sagði Karen Nótt í Morgunútvarpinu á Rás 2 í morgun. 

Karen Nótt segir Grímseyinga hafa sloppið við smit fram að þessu og bendir jafnframt á að ferðamannastraumurinn hafi verið meiri í ár en síðasta sumar sem gæti skýrt stöðuna sem nú er komin upp.