Mynd: RÚV
Athugið þessi frétt er meira en 2 mánaða gömul.
Býst við svipuðum tölum smita á morgun
Metfjöldi kórónuveirusmita á einum degi frá upphafi faraldursins greindist innanlands í gær og tók fram á miðjan dag í dag að greina sýnin vegna bilunar í tölvukerfi. Yfirlæknir á sýkla- og veirufræðideild Landspítalans segist búast við að svipaðar tölur yfir smit verði kynntar á morgun.
„Covid-göngudeildin er að vinna nálægt fullri afkastagetu við greiningu á Covid-sýnum. Afkastagetan er 4-5000 sýni á dag og við erum að nálgast það, segir Karl Gústaf. Hann segir að undir slíkum kringumstæðum megi ekkert koma upp á og seinni partinn í gær hafi orðið bilun í tölvubúnaði.
„Því þurfti að endurtaka keyrslur þegar viðgerð hafði farið fram í gærkvöldi. Það þurfti að keyra 600 sýni í dag sem voru frá gærdeginum.”
Aðspurður hvort greiningartölur dagsins í dag hafi í för með sér svipaðar tölur og metfjöldinn frá því í gær segist hann allt eins eiga von á því. „Þó er erfitt að meta á þessu stigi hvort þetta verður meira eða minna.“
Karl Gústaf segir að starfsfólk sé orðið langþreytt vegna manneklu og álags. Hann segir að ef enn frekar fjölgar í sýnum sem þarf að greina sé næst skref að kalla inn fólk úr sumafríi til að anna starfseminni. Hann vonar þó að til þess þurfi ekki að koma.
