Athugið þessi frétt er meira en 2 mánaða gömul.

Birgir Jónasson nýr lögreglustjóri á Norðurlandi vestra

Mynd með færslu
 Mynd: Grímur Jón Sigurðsson - RÚV
Dómsmálaráðherra hefur skipað Birgi Jónasson í embætti lögreglustjóra á Norðurlandi vestra frá 19. júlí.

Þetta kemur fram á vef Dómsmálaráðuneytisins. Birgir lauk meistaraprófi í lögfræði árið 2010 og MBA gráðu árið 2017. Þá lauk hann prófi frá Lögregluskóla ríkisins árið 2000 og hefur auk þess sótt sér ýmiss konar viðbótarmenntun.

Á árunum 1994-2002 starfaði hann við almenn löggæslustörf. Hann var lögreglufulltrúi hjá ríkislögreglustjóra frá 2002-2007. Þá starfaði hann sem laganemi og síðar lögfræðingur hjá lögreglustjóranum á höfuðborgarsvæðinu frá 2007-2009. Á árunum 2009-2016 starfaði hann hjá embætti sérstaks saksóknara, fyrst sem sérfræðingur og svo sem ákærandi. Þá var hann einnig aðstoðarmaður saksóknara Alþingis í landsdómsmálinu á árunum 2011-2012.

Birgir starfaði hjá Arion banka á sviði innri endurskoðunar á árunum 2016-2018. Frá árinu 2019 hefur hann starfað í greiningardeild ríkislögreglustjóra auk þess að sinna kennslustörfum á háskólastigi.

Jón Agnar Ólason