Athugið þessi frétt er meira en 12 mánaða gömul.

Ber Róbert þungum sökum í greinargerð til héraðsdóms

30.06.2021 - 11:46
Mynd með færslu
 Mynd: Aðsend mynd
Halldór Kristmannsson, fyrrverandi framkvæmdastjóri hjá Alvogen og Alvotech, ber Róbert Wessman, forstjóra og stjórnarformann Alvogen, þungum sökum í greinargerð sem hann hefur lagt fram í Héraðsdómi Reykjavíkur. Halldór fullyrðir að Róbert hafi meðal annars komið því til leiðar að gögnum innan úr Landsbanka og Straumi hafi verið lekið til fjölmiðils sem hann fjármagnaði og eignaðist síðar.

Greinargerðin er hluti af dómsmáli lyfjafyrirtækisins Alvogen gegn Halldóri vegna meints trúnaðarbrots í starfi. Fyrirtækið krefst þess að skaðabótaskylda Halldórs gagnvart fyrirtækinu verði viðurkennd. 

Halldór greindi frá því í mars að hann hefði persónulega upplifað, orðið vitni að og skjalfest fjölda tilfella af alvarlegu einelti og áreitni á vinnustaðnum af hálfu Róberts Wessmanns. Lögmaður Alvogen sagði engan fót fyrir ásökunum Halldórs sem vann náið með Róberti í 18 ár.

Í yfirlýsingu Halldórs kemur fram að hann hafi lagt fram gögn sem hann segir að sýni að Róbert hafi beitt undirmenn sína þrýstingi frá árinu 2010 til að koma höggi á athafnamenn í íslensku viðskiptalífi. Í yfirlýsingunni segir að þetta séu meðal annars Birgir Bieltvedt, feðgarnir Björgólfur Guðmundsson og Björgólfur Thor og Heiðar Guðjónsson, forstjóri Sýnar.

Halldór fullyrðir að Róbert hafi nýtt lykilstjórnendur til að koma höggi á meinta óvildarmenn sína, meðal annars með umfangsmiklum leka á trúnaðarupplýsingum sem varða bankaleynd. Þessi skæruliðahernaður, eins og það er orðað í yfirlýsingu Halldórs, er sagður hafa staðið í 11 ár og hafi gengið út á að klekkja á þekktum athafnamönnum, opinberum embættismönnum og blaðamönnum. 

Halldór segist enn fremur hafa lagt fram tölvupósta og önnur dómsskjöl sem sýni að Róbert og lykilstjórnendur Alvogen og Alvotech höfðu fulla stjórn á hópmálsókn gegn Björgólfi Thor Björgólfssyni í nafni fyrrverandi hluthafa Landsbankans. Halldór kveðst sjálfur hafa sinnt þessum verkefnum af fúsum og frjálsum vilja og hyggist ekki firra sig ábyrgð í þeim efnum.

Í greinargerðinni segir Halldór að oft hafi verið nóg að vera faðir meints óvildarmanns eða jafnvel að starfa með föður hans til að fá á baukinn. „Í ákveðnum tilvikum reyndist það meira að segja dýrkeypt að hafa þegið boð í afmæli. Skæruhernaður Róberts í gegnum Alvogen og Alvotech, ásamt umtalsverðum fjárfestingum í fjölmiðlum á undanförnum árum, sýna hversu miklu var tjaldað til þegar klekkja átti á meintum óvildarmönnum.“

Yfirlýsingu Halldórs til fjölmiðla má lesa hér að neðan:

Halldór Kristmannsson, fyrrverandi framkvæmdastjóri hjá Alvogen og Alvotech, steig fram í janúar og vakti athygli á stjórnarháttum og ósæmilegri hegðun Róberts Wessman. Hann hefur sent frá sér yfirlýsingu í kjölfar greinargerðar sem hann lagði fram í Héraðsdómi Reykjavíkur þann 8. júní síðastliðinn. Greinargerðin er hluti af vörn Halldórs gegn lyfjafyrirtækjunum sem stefndu honum, láku nafni hans og heilsufarsupplýsingum til fjölmiðla og riftu ráðningarsamningi eftir að hann steig fram sem uppljóstrari.

Í greinargerðinni upplýsir Halldór nánar um þau atriði sem hann greindi stjórnum Alvogen, Alvotech og dótturfyrirtækisins Lotus Pharmaceuticals í Tævan frá í janúar.  Þar greinir hann meðal annars frá ósæmilegri hegðun Róberts undir áhrifum áfengis, líkamsárásum á nána samstarfsmenn, morðhótunum gagnvart fyrrum samstarfsmönnum og fjölskyldum þeirra og hvernig æðstu stjórnendum lyfjafyrirtækjanna var óspart beitt gegn meintum óvildarmönnum forstjórans. Þá innifelur greinargerðin einnig viðkvæmar trúnaðarupplýsingar fyrirtækjanna sem Halldór mun ekki hafa frumkvæði að því að fjalla um í fjölmiðlum, þar sem þær kunna að skaða viðskiptahagsmuni þeirra. 

„Eins og áður hefur komið fram er ég nauðbeygður til að verja mig í málinu, og mun því eðlilega leggja fram nauðsynleg sönnunargögn. Í tilefni af vörn minni fyrir héraðsdómi, vil ég byrja á að svara sérstaklega fullyrðingum um að engar stoðir hafi verið fyrir mínum ábendingum. Yfirlýsingarnar eru augljós markleysa og í besta falli klaufaleg tilraun til „hvítþvotts“, þar sem festa eigi þöggun og meðvirkni gagnvart Róbert í sessi innan fyrirtækjanna.“

Æðstu stjórnendum falið að klekkja á tugum óvildarmanna  

Halldór greinir frá því hvernig Róbert hafi nýtt lykilstjórnendur Alvogen og Alvotech til að koma höggi á meinta óvildarmenn sína, meðal annars með umfangsmiklum leka á trúnaðarupplýsingum er varða bankaleynd. Halldór segir „skæruliðahernað“ Róberts gegn á þriðja tug óvildarmanna hafa staðið yfir í 11 ár, sem hafi gengið út á að klekkja á þekktum athafnamönnum í íslensku viðskiptalífi, opinberum embættismönnum og blaðamönnum. Vaxandi ágreiningur hafi myndast milli hans og Róberts vegna þessa, þar til Halldór steig fram sem uppljóstrari.  Halldór segist hafa greint stjórnum Alvogen og Alvotech frá því hvernig Róbert hafi nýtt stjórnendur fyrirtækjanna með þessum hætti, en „slökkviliðið“ hafi verið of upptekið af „hvítþvotti“ forstjórans og hafi ekki sýnt þessu nokkurn áhuga.

Halldór segir Róbert hafa beitt undirmenn sína þrýstingi frá árinu 2010, til að koma höggi á hóp athafnamanna í íslensku viðskiptalífi og hefur lagt fram ítarleg gögn því til staðfestingar.  Má þar meðal annars nefna: Andra Sveinsson, Birgi Bieltvedt,  Birgi Má Ragnarsson, Björgólf Thor Björgólfsson, Björgólf Guðmundsson, Claudio Albrecht fyrrv. forstjóra Actavis, Ernu Kristjánsdóttur og syni hennar Ólaf og Kristján Guðmundssyni, Frank Pitt, Guðmund Kristjánsson, Gunnar Fjalar Helgason, Heiðar Má Guðjónsson, Magnús Þorsteinsson, Matthías Johannessen, Peter Prock fyrrv. aðstoðarforstjóra Actavis, Ragnar Þórison og Tómas Áka Gestson.  Auk þess má nefna meinta erlenda óvildarmenn Róberts sem höfðu þegið boð í afmælisveislu Björgólfs Thors, þá Ari Salmivuori fyrrum hluthafa í Landsbankanum og Georg Tsvetanski kaupsýslumann. Vel á annað hundrað greinar birtust í fjölmiðlum er sköpuðu neikvæða umræðu um fjármál, bankaviðskipti og önnur trúnaðarmál, sem tengdust ofangreindum aðilum.

Halldór hefur áður greint frá því hvernig hann var beittur þrýstingi til að klekkja á háttsettum embættismönnum og erlendum fjárfesti og því hafi hann staðfastlega neitað, enda taldi hann ásakanir Róberts á hendur þeim í senn meiðandi og svívirðilegar.

Trúnaðarupplýsingum lekið frá Landsbanka og Straumi

Halldór segir að gögnum innan úr bankastjórnum Landsbanka Íslands og Straumi banka hafi markvisst verið lekið og má þar meðal annars nefna samskipti bankaráðs við Fjármálaeftirlitið, upplýsingar um lánafyrirgreiðslur meintra óvildarmanna og ýmis önnur samskipti og gögn sem bundin eru bankaleynd og áttu sér stað fyrir fjármálahrunið.  Halldór segist meðal annars hafa lagt fram gögn sem sýna hvernig Róbert fól Árna Harðarsyni aðstoðarforstjóra Alvogen að leka trúnaðarupplýsingum innan úr Landsbanka og Straumi til fjölmiðils, sem hann hafi fjármagnað og síðar eignast. Halldór segir að stór hluti samskiptanna hafi átt sér stað í gegnum tölvupósta fyrirtækisins, en einnig í gegnum netföng með dulnöfnum.

Í greinargerð Halldórs kemur einnig fram að Róbert hafi falið lykilstjórnendum fyrirtækjanna, þar á meðal Árna Harðarsyni aðstoðarforstjóra, Þór Kristjánssyni framkvæmdastjóra og fyrrum bankaráðsmanni hjá Landsbankanum og Straumi, ásamt Halldóri að undirbúa og leiða hópmálsókn gegn Björgólfi Thor Björgólfssyni. Málsóknin var gerð í nafni fyrrum hluthafa Landsbankans, þrátt fyrir að Alvogen, Alvotech eða Róbert sjálfur hafi aldrei verið hluthafar í bankanum. Þá var Þór Kristjánsson ráðinn til Alvogen á árinu 2010 gagngert til að afhenda upplýsingar sem nýst gætu í fyrirhugaðri málsókn Róberts. Lögmannsstofan Landslög tók við umræddum gögnum frá duldum netföngum Þórs og hefur leitt málið síðastliðin 11 ár fyrir hönd Róberts.  Halldór hefur afhent tugi tölvupósta og annarra dómsskjala með greinargerð sinni sem staðfesta ofangreinda málavexti og sýna hvernig Róbert og lykilstjórnendur Alvogen og Alvotech höfðu fulla stjórn á umræddri hópmálsókn með Landslögum, og dreifðu trúnaðarupplýsingum til fjölmiðla í störfum sínum fyrir fyrirtækin. Halldór segist hafa sinnt þessum verkefnum af fúsum og frjálsum vilja, líkt og aðrir lykilstjórnendur fyrirtækjanna og muni ekki firra sig ábyrgð í þeim efnum.

„Ég benti „slökkviliðinu“ á það hvernig Róbert nýtti undirmenn sína og fjármuni fyrirtækjanna óspart í þeim tilgangi að koma höggi á meinta óvildarmenn. Á löngum köflum gafst lítill tími til að sinna mikilvægum málefnum innan fyrirtækjanna vegna verkefna sem höfðu ekkert með rekstur þeirra að gera.  Að lokum var svo komið að ég sem stjórnandi og hluthafi gat ekki horft lengur upp á þráhyggju og hatur Róberts gagnvart þessum aðilum og hvernig fyrirtækjunum var beitt í þeim efnum. Ég gerði alvarlegar athugasemdir við Róbert sumarið 2018 og aftur á átakafundi þann 1. september 2020 vegna þessara mála, en þá voru málefni meintra óvildarmanna orðin einstaklega persónuleg og meiðandi. Í framhaldinu átti ég ekki annan kost en að stíga fram sem uppljóstrari og greina stjórnum fyrirtækjanna frá málavöxtum.

Oft var það nóg að vera faðir meints óvildarmanns eða jafnvel að starfa með föður hans til að fá á baukinn. Í ákveðnum tilvikum reyndist það meira að segja dýrkeypt að hafa þegið boð í afmæli. Skæruhernaður Róberts í gegnum Alvogen og Alvotech, ásamt umtalsverðum fjárfestingum í fjölmiðlum á undanförnum árum, sýna hversu miklu var tjaldað til þegar klekkja átti á meintum óvildarmönnum.“

Heilræði til Róberts

„Róbert hefur sjálfur neitað að tjá sig um líkamsárásir og ósæmilega hegðun undir áhrifum áfengis. Hann segist bundinn trúnaði og bætti reyndar um betur í nýlegu viðtali við Fréttablaðið er hann sagði að um væri að ræða viðkvæmt starfsmannamál. Róbert telur þó málið ekki viðkvæmara en svo að hann lét leka nafni mínu til fjölmiðla ásamt heilsufarsupplýsingum og hefur ekki brugðist við ítrekuðum sáttaboðum.

„Ekki bera fyrir þig trúnað, því það ríkir enginn trúnaður um ofbeldi og ósæmilega hegðun, ekki segjast hafa verið í flugvél, það er bara svo kjánalegt og ekki velta þér upp úr því þó að ég hitti eða tali við meinta óvildarmenn þína. Sýndu þess í stað auðmýkt og virðingu og svaraðu af heiðarleika. Þannig gerir þú hreint fyrir þínum dyrum og setur hagsmuni fyrirtækjanna framar þínum eigin.“