Athugið þessi frétt er meira en 6 mánaða gömul.

Staðan í bólusetningum með besta móti hér á landi

Mynd með færslu
 Mynd: Kristín Sigurðardóttir - RÚV
Góður gangur hefur verið í bólusetningum á Íslandi og nú er svo komið að staðan er með besta móti í alþjóðlegu samhengi. Þetta kemur fram á vef Stjórnarráðsins.

Bólusetningar gegn COVID-19 hófust hér á landi í lok desember síðstliðnum. Bólusett var eftir forgangsröðun og gekk vel að bólusetja elstu aldurshópa, framlínuhópa og hópa með undirliggjandi sjúkdóma á fyrsta fjórðungi ársins. Á öðrum fjórðungi hefur gengið mjög vel að klára bólusetningu þessara hópa sem og bólusetningu yngra fólks.

Þann 24. júní höfðu 258.120 Íslendingar fengið að minnsta kosti fyrri bólusetningu. Þar af höfðu 174.732 fengið fulla bólusetningu.
Staðan hér á landi er nú með besta móti í alþjóðlegu samhengi ef litið er til fjölda sem fengið hefur að minnsta kosti einn skammt bóluefnis.

Í alþjóðlegum samanburði er Ísland nú að nálgast að vera í forystu þegar kemur að hlutfalli sem hefur þegið bólusetningu við covid-19. Í ljósi mikils vilja til þátttöku og framúrskarandi skipulagi á framkvæmd bólusetningar verður að teljast sennilegt að Ísland sé nú þegar komið með betri samfélagslega vörn gegn covid-19 en flest samanburðarlönd eru líkleg til að ná.

Jón Agnar Ólason