Athugið þessi frétt er meira en 3 mánaða gömul.

Gera athugasemdir við skýrslu Haraldar

Mynd með færslu
 Mynd: RÚV
Félag íslenskra fæðinga- og kvensjúkdómalækna, FÍFK, segir það vonbrigði að í skýrslu um breytingar á skipulagi og framkvæmd skimunar fyrir leghálskrabbameini sé ekki gætt viðhorfs heilbrigðisstarfsfólks. Þá fari Haraldur Briem skýrsluhöfundur með rangt mál um biðtíma eftir niðurstöðum rannsókna.

 

Þetta kemur fram í erindi stjórnar félagsins til heilbrigðisráðherra. Stjórn félagsins gerir athugasemdir við að eingöngu sé stuðst við heimildir frá þeim aðilum sem beri ábyrgð á núverandi starfsemi. Skýrslan beri þess merki að ekki hafi farið fram skoðun á hvort upplýsingarnar séu réttar eður ei. 

Verið sé að auka hættu á mistökum

Skýrsluhöfundur hafi þá ekki nefnt að ekki hafi verið gert áhættu- og öryggismat á breytingunum sem átti að innleiða. Fullyrt sé í skýrslunni að biðtími eftir niðurstöðum rannsókna sé 2-3 mánuðir. Læknarnir segja það rangt, enn hafi ekki borist svör fyrir sýni sem voru tekin fyrir þremur og hálfum mánuði síðan. Einnig sé sérstaklega athugavert að skýrsluhöfundur geri ekki athugasemd við að beiðni sem sett sé inn í danskan gagnagrunn sé skrifuð af öðrum aðila. Með því fyrirkomulagi sé verið að auka hættu á mistökum.

Þá segir í athugasemdum stjórnar FÍFK að væntingar hafi verið gerðar til þess að skýrslan myndi sannarlega vera óháð álit á breytingaferlinu og mikilvægur lærdómur til framtíðar. Það séu vonbrigði að sjá að skýrslan taki nær eingöngu mið af frásögn framkvæmdaaðilans og hvorki hafi verið skoðuð viðhorf skjólstæðinga né heilbrigðisstarfsfólks.

Rannsóknarlæknar efast um að Haraldur Briem sé óháður

Áður hafði skýrslan, sem send var til heilbrigðisráðherra 11. júní, verið gagnrýnd af félagi íslenskra rannsóknarlækna sem sagði hana ófullnægjandi, skýrsluhöfundur gæti tæplega talist óháður og var heilbrigðisráðuneytið sagt hafa gert lítið úr sérfræðiþekkingu íslenskra rannsóknarlækna.

Ekki náðist í Harald Briem, höfund skýrslunnar, við gerð fréttarinnar.

Erindi FÍFK má sjá hér að neðan.

Til hæstvirts heilbrigðisráðherra Svandísar Svavarsdóttur

Stjórn Félags íslenskra fæðinga- og kvensjúkdómalækna (FÍFK) vill koma á framfæri athugasemdum við skýrslu heilbrigðisráðherra um breytingar á skipulagi og framkvæmd skimunar fyrir leghálskrabbameini.

Efnistök skýrslunnar

Í heimildaskrá skýrslunnar eru einungis heimildir frá aðilum sem bera ábyrgð á núverandi starfsemi. Skýrslan ber þess merki að ekki hafi farið fram skoðun á hvort upplýsingarnar séu réttar eða rætt við notendur ferilsins. Í heimildaskrá vantar einnig bæði álit fagráðs. Fagráðið klofnaði og var álit minnihlutans notað, en bæði minni- og meirihluti skiluðu inn áliti. Þegar meta á hvaða upplýsingar voru til staðar fyrir ákvarðanatöku um breytingar á ferlinum verður að teljast sérkennilegt að sleppa áliti fagráðs sem skipað var til að ráðleggja um breytingar á ferlinum áður en þær fóru fram.

Skýrslan tekur ekki afstöðu til bréfa frá fagfélögum rannsóknarlækna og kvensjúkdómalækna til heilbrigðisráðherra, heilsugæslunnar og landlæknis þar sem bent er á ógnir og annmarka á ferlinum. Ekki var haft samband við fagfélögin við vinnslu skýrslunnar.

Öryggi sjúklinga

Fullyrt er í skýrslunni að núna sé biðtími eftir niðurstöðum rannsókna 2-3 mánuðir. FÍFK hefur fylgst með hvenær rannsóknarsvör berast til félagsmanna með því að nota signet transfer sem er excel skjal sem opnað er með rafrænum skilríkjum.

· 15.apríl bárust sýni frá byrjun janúar og einstaka sýni frá febrúar.

· 17.maí bárust sýni frá byrjun janúar og fram í lok febrúar.

Það er því ekki rétt að svartími sé 2-3 mánuðir þegar enn hafa ekki borist svör fyrir sýni sem tekin voru fyrir þremur og hálfum mánuði síðan.

FÍFK gerir einnig athugasemd við að skýrsluhöfundur nefni ekki að það var ekki gert áhættu- og öryggismat á þessum viðamiklu breytingum sem átti að innleiða. Skýrsluhöfundur gefur það álit að öryggi í skimun byggist fyrst og fremst á gæðum rannsókna á leghálssýnum. Algjörlega er litið framhjá því að ferillinn í heild þarf að vera öruggur.

Sérstaklega er athugavert að skýrsluhöfundur gerir ekki athugasemd við að beiðni sýnatökuaðila sem sett er inn í íslenskan gagnagrunn skuli ekki vera notuð heldur að beiðnin sem sett er inn í danska gagnagrunninn sé skrifuð af öðrum aðila og fer eftir hvaða númer er á plastpokanum sem sýnaglasið liggur í. Veikasti hlekkur kerfis er yfirfærsla upplýsinga og er ljóst að hér er verið að auka áhættu á mistökum í núverandi kerfi. Það að handvirkt breyta íslenskri kennitölu yfir í danska og aftur tilbaka þegar svar er fært inn í íslenskt kerfi er stór öryggisógn.

Skýrsluhöfundur telur að núverandi kerfi hafi ekki áhrif á aðgengi sérfræðinga að niðurstöðum rannsóknaraðila. Okkur vitandi hafði skýrsluhöfundur ekki samband við neinn utan kerfisins þegar mat var gert á aðgengi.

Upplýsingagjöf

Engin athugasemd er gerð við það af skýrsluhöfundi að upplýsingaflæði frá framkvæmdaraðilum hafi verið stopult bæði til sjúklinga og lækna. Skýrsluhöfundur bendir ekki á mikilvægi öflugrar upplýsingagjafar við breytingar á ferlinum.

Það er flestum ljóst eftir umræður síðustu mánaða að breytingar á ferli leghálsskimunar hafa ekki gengið vel. Væntingar stjórnar FÍFK voru að skýrsla heilbrigðisráðherra myndi sannarlega vera óháð álit á breytingarferlinum og mikilvægur lærdómur til framtíðar. Það eru vonbrigði að sjá að skýrslan hefur nær eingöngu tekið mið af frásögn framkvæmdaraðilans og skoðar ekki viðhorf notenda, hvorki skjólstæðinga né heilbrigðisstarfsfólks.

Fyrir hönd stjórnar FÍFK

Aðalbjörg Björgvinsdóttir

Formaður FÍFK

 

Andri Magnús Eysteinsson