Athugið þessi frétt er meira en 2 mánaða gömul.

Bikblæðingar í Norðurárdal og Skorradalsvegur lagaður

Mynd með færslu
 Mynd: Kristinn Þeyr Magnússon - RÚV
Vegagerðin varar við því að bikblæðinga hefur orðið vart í Norðurárdal í Borgarfirði. Því eru vegfarendur hvattir til varkárni á þeim slóðum. Í vikunni var Skorradalsvegur lagfærður svo hann gæti betur þjónað sem flóttaleið úr dalnum komi upp alvarlegir gróðureldar.

Vegblæðingar fylgja miklum hitasveiflum á skömmum tíma og verða oft í þeim klæðningum sem lagðar eru á stóran hluta íslenska vegakerfisins. Við lagningu slitlags er notuð lífolía til að mýkja bikið svo auðveldara sé að leggja það.

Að því er fram kemur á vef Vegagerðarinnar reynist veðurfar á Íslandi áskorun, bæði lágur hiti á sumrin þegar verið er að leggja bundið slitlag og tíðar sveiflur á milli frosts og þíðu á veturna.

Malbikað er frá Reykjavík að Borgarnesi til vesturs og til austurs að Þjórsárbrú á Suðurlandi. Eins er malbik á leiðum út frá Akureyri. 

Skorradalsvegur lagfærður

Starfsmenn Vegagerðarinnar unnu í vikunni við lagfæringar á Skorradalsvegi frá Fitjum í Skorradal sem tengist Uxahryggjavegi. Það var gert að beiðni lögreglustjórans á Vesturlandi í þágu almannavarna enda litið á að bæta þyrfti veginn svo hann geti þjónað sem flóttaleið úr Skorradal.

Einkum er litið til hættunnar af gróðureldum í því samhengi. Skessuhorn hefur það eftir Valgeiri Ingólfssyni yfirverkstjóra hjá Vegagerðinni í Borgarnesi og að tveggja milljóna aukafjárveiting hafi fengist til verksins.

Valgeir segir veginn enn aðeins færan vel búnum jeppum en þó öllu fljótfarnari eftir hann var heflaður og borið í hann.