Athugið þessi frétt er meira en 4 mánaða gömul.

Bjarni um Samherjamál: „Menn ganga mjög langt“

25.05.2021 - 15:16
Mynd með færslu
 Mynd: RÚV
Bjarni Benediktsson fjármálaráðherra og formaður Sjálfstæðisflokksins segist ekki vera ánægður með að stórir öflugir aðilar í fyrirtækjarekstri beiti sér af fullum krafti í fjölmiðlaumfjöllun sem þeir eru ósáttir við.

Starfsmenn á vegum Samherja ræddu það sín á milli að „koma saman nothæfum lista“ í prófkjöri sjálfstæðismanna í Norðausturkjördæmi. Þetta kemur fram í umfjöllun Kjarnans um gögn sem sýna tölvupóstsamskipti og samtöl milli einstaklinga í spjallforriti. Stundin hefur einnig fjallað um þessi gögn.

Bjarni Benediktsson formaður Sjálfstæðisflokksins segir óeðlilegt að fyrirtæki séu að reyna að hafa áhrif á framboðsmál stjórnmálaflokka.

„Mér finnst auðvitað óeðlilegt almennt ef að fyrirtæki vilja hafa áhrif á framboðsmál stjórnmálaflokka en ég get nú ekki sagt að ég hafi orðið var við það eða hafi haft spurnir af því að það hafi haft einhver áhrif eða liggur það ekki fyrir samkvæmt lista yfir frambjóðendur að það virðist ekki hafa gengið eftir sem menn voru að véla um,“ segir Bjarni.

Hefur þú komið einhverjum athugasemdum á framfæri við Þorstein [Þorstein Má Baldvinsson forstjóra Samherja] út af þessu?

„Nei ég hef ekki verið í neinum samskiptum.“

Ætlar flokkurinn að taka við fjárframlögum frá Samherja í ljósi þessa?

„Við höfum ekkert velt því fyrir okkur.“

En þér finnst þetta sem sagt óeðlilegt?

„Við þurfum aðeins að gera okkur grein fyrir því um hvað er að ræða hérna. Spjall manna á einhverjum þræði, í tölvupóstsamskiptum þar sem menn eru að hugsa upphátt og það sem ég er að segja er að ég hef ekkert orðið var við það að neitt af því sem þar er verið að spjalla um hafi raungerst.“

En hvað finnst þér um þessa herferð gagnvart einstökum fjölmiðlamönnum og jafnvel fjölmiðlum? Það kemur fram í þessum uppljóstrunum að það er verið að beita mjög skipulögðum aðferðum til þess að grafa undan einstökum fjölmiðlamönnum.

„Maður getur haft alls konar skoðanir á því að fólk eigi ekki að gera eitthvað eða gera hlutina öðruvísi heldur en gert er. En ég er í prinsippinu þeirrar skoðunar að það er skoðanafrelsi á Íslandi. Fólki er frjálst að hugsa hluti, fólki er frjálst að segja hluti, fólki er frjálst að beita sér. Það er mjög stórt mál að fara að ganga gegn því frelsi. Ég er hins vegar ekkert sérstaklega ánægður með að stórir öflugir aðilar í fyrirtækjarekstri beiti sér af fullum krafti í fjölmiðlaumfjöllun sem þeir eru ósáttir við. Aðallega vil ég að hlutirnir séu uppi á borði, gegnsæir og það sé verið að ræða málefnalega um hlutina. Það er það sem mér finnst vera mikilvægt. Ég held líka að við verðum að hlusta ef menn segja að ríkismiðillinn, sem hefur mjög ríkum skyldum að gegna, ef menn segja að hann sé ekki að rísa undir því sem að honum ber að gera að lögum og er réttlætingin fyrir því að við öll tökum sameiginlega þátt í því að halda honum á floti og fjármagna hann þá ber okkur að hlusta. Ekki skella við skollaeyrum. Jafnvel þó að fyrirtæki eigi í hlut og það geta verið fyrirtæki sem ganga vel. Okkur ber að hlusta og vera gagnrýnin. Beita gagnrýninni hugsun í allri umræðu um þessi mál. Þarna er ég að tala um þetta á almennum nótum en í þessu tiltekna máli finnst mér menn ganga mjög langt,“ segir Bjarni.

Höskuldur Kári Schram
Fréttastofa RÚV