Athugið þessi frétt er meira en 4 mánaða gömul.

ÍFF harmar og hafnar dylgjum forystu ASÍ

23.05.2021 - 17:11
Mynd með færslu
 Mynd: RÚV
Íslenska flugstéttarfélagið segist furða sig á vinnubrögðum ASÍ að reka áróður gegn félaginu gegn viðsemjendum þess. Einnig furðar ÍFF sig á því að ASÍ fari fyrst með rangmæli sín um ÍFF og kjarasamninga þess við PLAY í fjölmiðla áður en leitað er svara hjá félaginu.

Þetta er meðal þess sem kemur fram í yfirlýsingu frá stjórn ÍFF sem send var út seinni partinn í dag. Þar kemur fram að félagið, sem áður var stéttarfélag flugmanna hjá WOW air, hafi víkkað út félagið og boðið fleiri starfstéttum að ganga í félagið. 

Ástæða breytingarinnar var að búa til tækifæri fyrir félagsmenn og fyrrverandi samstarfsmenn til að geta stundað fag sitt á Íslandi. Sem var samþykkt og úr varð Íslenska flugstéttafélagið. Hjá ÍFF er starfræktur sjúkrasjóður, SÍFF, einnig orlofsnefnd, stoðnefnd, alþjóðanefnd, samstarfsnefnd, samninganefnd, starfsráð og trúnaðarráð. ÍFF leitaði til PLAY, áður WAB, og óskaði eftir að félagið myndi gera kjarasamning við sig.

 

Þá furðar stjórn félagsins á vinnubrögðum ASÍ að reka áróður gegn félaginu og viðsemjanda þess. Í góðri trú áttu fulltrúar ÍFF fund með ASÍ 3. júní 2020 þar sem starfsemi ÍFF var kynnt. Eftir fundinn vorum við spurð hvort við höfum skoðað að ganga í samtök ASÍ. Óskuðum við þá eftir kynningu um hvað slík aðild myndi fela í sér. Ekkert hefur enn heyrst frá ASÍ. Einnig furðar ÍFF sig á því að ASÍ fari fyrst með rangmæli sín um ÍFF og kjarasamninga þess við PLAY í fjölmiðla áður en leitað er svara hjá félaginu. Í krafti stærðar og tengsla sinna eru þetta ósanngjörn og ódrengileg vinnubrögð af aðal talsmanni hinna vinnandi stétta á Íslandi. Vegur þar þyngst að okkar mati fullyrðing forseta ASÍ um að lægstu laun flugliða séu undir lágmarkslaunum í landinu eða um 260 þúsund þegar staðreyndir hafa verið raktar um að þau séu um 352 þúsund, án vinnuframlags, í veikindum eða orlofi.

ÍFF harmar og hafnar öllum þeim dylgjum og rangfærslum sem viðhafðar hafa verið af forystu ASÍ. Ásakanir um að ÍFF sé “gult stéttarfélag” eru særandi og móðgun við okkur og það sem við stöndum fyrir. Samingar okkar eru gerðir í góðri trú eftir þeim leikreglum sem mótast hafa gegnum tímann til að skapa tækifæri fyrir félagsmenn og alls ekki til höfuðs annarra félaga eða starfsbræðra og -systra.

 

Þetta kemur fram í tilkynningu frá stjórn félagsins.