Athugið þessi frétt er meira en 5 mánaða gömul.

Þurrkar og kuldi há sprettu verulega

Mynd með færslu
 Mynd: Rúnar Snær Reynisson - RÚV
Þurrt og kalt vor tefur sprettu á Suður- og Vesturlandi. Sauðfjárbóndi segir bændur þurfa að vera með nýbornar ærnar á fullri gjöf út maí. Grænmetisbændur eru tvístigandi. 

Hefur áhrif á búskapinn

Ekki þarf að leita lengra aftur en til ársins 2019 til að finna lengra þurrkatímabil en nú, fyrstu fjórir mánuðir ársins hafa þó verið þeir þurrustu frá árinu 1995. 

Unnsteinn Snorri Snorrason, framkvæmdastjóri hjá Landssamtökum sauðfjárbænda og bóndi á Syðstu-Fossum í Andakíl í Borgarfirði, er með 120 vetrarfóðraðar ær, tíðarfarið undanfarið hefur haft áhrif á búskapinn. „Það hefur verið bærilegt varðandi það að geta sett út lambfé og slíkt en þurrkarnir og kuldinn er farinn að há sprettu verulega. Það þarf að gefa fénu vel með beitinni.“

Mynd með færslu
 Mynd: Bragi Valgeirsson - RÚV
Unnsteinn Snorri Snorrason. Myndin er tekin um mitt sumar árið 2019 og túnin ívið grænni en nú.

Hann segir að flestir bændur eigi enn nóg af góðu heyi handa ánum. „Já, almennt er það nú að bændur gera ráð fyrir að þurfa að gefa út maímánuð, það hefur kannski ekki verið raunin síðustu árin en sagan kennir okkur það að það getur þurft.“

Næturfrost tafið fyrir útiræktun

Bændum hefur í gegnum tíðina oft gengið erfiðlega að fá áheyrn veðurguða. Unnsteinn segir að nú láti rigningin bíða eftir sér, svo láti hún líklegast sjá sig í júní þegar bændur þurfi þurrkinn. Gunnar Þorgeirsson, garðyrkjubóndi og  formaður Bændasamtakanna, segir næturfrostið hafa tafið fyrir útiræktun og ekki hægt að setja niður kartöflur nema undir hlífðarplasti. Bændur séu tvístígandi og bíði þess að jarðvegurinn hitni almennilega. Sáning á korni fer líka hægt af stað. 

Rigningin myndi breyta öllu

Túnin eru heldur gul núna, bara grashýjungur og lítil framför að sögn Unnsteins en það gæti breyst. Góð úrkoma myndi koma sprettunni af stað og leysa upp áburðinn. „En ef við fáum rigningu, góða rigningu á næstu dögum mun það breyta öllu og það er, akkúrat núna, svona smá úði hér í Borgarfirði allavega,“ segir Unnsteinn.