Gunnar Smári Egilsson, formaður framkvæmdastjórnar Sósíalistaflokks Íslands. Mynd: RÚV
Athugið þessi frétt er meira en 5 mánaða gömul.
Sósíalistaflokkurinn vill stofnun ofbeldiseftirlits
Sósíalistaflokkurinn leggur til að ofbeldiseftirlit verði stofnað sem geti brugðist við þar sem sýnt sé að ofbeldi og áreiti vaði uppi. Eftirlitið hafi vald til að fjarlægja ofbeldismenn, svipta staði starfsleyfi og tryggja öryggi með öðrum leiðum.
Þetta kemur fram í því sem flokkurinn kallar þriðja tilboð sitt og var lagt fram í dag, uppstigningardag. Einkum skuli eftirlitið beina sjónum þangað sem valdajafnvægi sé ríkjandi vegna tekju- eða aldursmunar, ólíks uppruna, stöðu eða valds.
Mikilsvert sé að auka vitund allra um líkamlegar og afleiðingar ofbeldis.
„Kynbundið ofbeldi er alvarlegt mein í samfélaginu sem veldur stórkostlegum persónulegum skaða, dregur úr virkni fólks og veldur útbreiddu óöryggi í samfélaginu. Það er því til mikils að vinna að draga sem mest úr þessum faraldri.“
Sömuleiðis leggur Sósíalistaflokkurinn til að stofnuð verði sérstök lögreglu- og ákærustofnun sem sérhæfi sig í rannsókn og meðferð kynbundinna ofbeldismála og styðji við brotaþola á öllum stigum máls.
Þeim verði jafnframt tryggð gjafsókn til að reka einkamál gegn brotamönnum, viðeigandi meðferð og greiðslur úr opinberum sjóðum þegar ekki fást bætur í einkamálum.
