Athugið þessi frétt er meira en 5 mánaða gömul.

Óbreytt í viku – reiknar með alvöru breytingum næst

Mynd með færslu
 Mynd: Vilhjálmur Þór Guðmundsson - RÚV
Svandís Svavarsdóttir, heilbrigðisráðherra, hefur ákveðið að framlengja núverandi reglugerð um eina viku og verða samkomutakmarkanir því óbreyttar fram í næstu viku. Svandís reiknar með alvöru breytingum í næstu viku og vonandi viðamiklum.

Þórólfur Guðnason sóttvarnalæknir skilaði minnisblaði til heilbrigðisráðherra á sunnudag með tillögum sínum um sóttvarnaaðgerðir innanlands.

Venju samkvæmt fór heilbrigðisráðherra með minnisblaðið og tillögurnar á fund ríkisstjórnarinnar sem kom saman til fundar í morgun. 

Svandís sagði við fréttamenn eftir fundinn að núverandi reglugerð yrði framlengd um eina viku.  Það hefði verið mat sóttvarnalæknis að ná þyrfti betra jafnvægi á smit innanlands og bíða með óbreytt ástand í eina til tvær vikur.  

Svandís sagðist reikna með að gripið yrði til umfangsmikilla og vonandi alvöru afléttinga strax í næstu viku. Stjórnvöld ætluðu sér að standa við afléttingaráætlun sína enda væri góður gangur í bólusetningum og nærri 40 prósent yrðu komin með að minnsta kosti einn skammt í vikulok.

Hún benti jafnframt á að það væri góður gangur á landamærunum og svo virtist sem það væri að takast að ná utan um hópsýkingarnar innanlands. „Markmiðið er að standa við þessa áætlun,“ sagði Svandís. Sex greindust með smit innanlands í gær og voru allir nema einn í sóttkví.

Núverandi reglugerð átti að falla úr gildi á miðnætti annað kvöld en því hefur nú verið frestað fram til fimmtudagsins 13. maí. Tuttugu mega koma saman og sund-og líkamsræktarstöðvum verður áfram heimilt að taka á móti helmingi af leyfilegum hámarksfjölda gesta. 

freyrgigja's picture
Freyr Gígja Gunnarsson
Fréttastofa RÚV