Hraunbombur geta þeyst nokkur hundruð metra frá gígnum

Mynd með færslu
 Mynd: Sólveig Thomasdóttir
Hætta er á að kviku- eða gjóskumolar, stundum kallaðir hraunbombur, geti þeyst nokkur hundruð metra þegar háir kvíkustrókar myndast í eina gígnum sem gýs úr í Geldingadölum. Nýtt hættumat liggur fyrir en það veltur á vindi hversu nálægt fólk getur farið. „Það er ekki öruggt að standa mjög nálægt þessu svæði,“ segir Björn Oddsson, jarðeðlisfræðingur hjá almannavörnum.

Fréttastofa veit um nokkur dæmi þar sem fólk hefur þurft að leita skjóls þegar bomburnar lenda langt frá gígnum. Á myndinni sem fylgir þessari frétt sjást börn lenda í svona gjósku. 

Bomburnar má rekja til þess að nýverið varð breyting á gosinu þegar háir kvikustrókar fór að myndast í eina gígnum sem enn gýs úr í Geldingadölum. Hinir tignarlegu strókar sjást víða á suðvesturhorni landsins.

Vísindamenn hafa ekki fundið neina sérstaka ástæðu fyrir þessari breyttu hegðun en vitað er að það er gas sem þeytir strókunum upp. „Vísindamenn eru að reyna að svara þessari spurningu en það er ekki komið eitt svar,“ segir Björn.

Það er áfram vinsælt að ganga upp að gosstöðvunum og Veðurstofan hefur útbúið nýtt hættumat fyrir svæðið. Björn segir að til viðbótar við það svæði þar sem talið er að nýjar sprungur geti opnast er búið að reikna út stærð bombanna og hvar þær geta lent, bæði í vindi og í logni. 

Það fer því eftir hvernig vindar blása hversu nálægt fólk getur farið en Björn ítrekar að það sé ekki öruggt að fara mjög nálægt.

  

freyrgigja's picture
Freyr Gígja Gunnarsson
Fréttastofa RÚV
johann's picture
Jóhann Bjarni Kolbeinsson
Fréttastofa RÚV