Hópuppsögn hjá SaltPay sú eina í apríl

04.05.2021 - 14:52
Mynd með færslu
 Mynd: RÚV
Vinnumálastofnun barst ein tilkynning um hópuppsögn í apríl þegar 55 starfsmönnum færslu­hirðinga­fyr­ir­tæk­isins SaltPay/Borgun, var sagt upp. SaltPay keypti ráðandi hlut í Borgun í fyrra og síðan þá hefur tugum starfsmanna verið sagt upp og tugir nýir ráðnir.

Í tilkynningu á vef Vinnumálastofnunar kemur fram að uppsagnirnar komi til framkvæmda á tímabilinu ágúst til nóvember á þessu ári. Andrés Jónsson, fjölmiðlafulltrúi SaltPay, segir að fólkið sé flest tæknifólk og einhverjir starfi á fjármálasviði. Í tilkynningu sem barst frá SaltPay í apríl sagði að þau sem létu af störfum hefðu flest starfað við að þróa og viðhalda eldra greiðslukerfi Borgunar.

Samkvæmt Andrési eru ekki fyrirhugaðar frekari uppsagnir hjá fyrirtækinu.