Athugið þessi frétt er meira en 5 mánaða gömul.

Bóluefnin virka þótt engar aukaverkanir fylgi

Mynd með færslu
 Mynd: RÚV - Ágúst Ólafsson
Þórólfur Guðnason sóttvarnalæknir segir að þótt fólk finni ekki fyrir aukaverkunum eftir bólusetningu, þýði það ekki að bóluefnið virki ekki sem skyldi. Fjölmargir sem farið hafa í bólusetningu hafa fundið fyrir aukaverkunum í kjölfarið, og hefur komið fram að það sé merki um að bóluefnið sé að virka. Þórólfur segir hins vegar að fólk sem finnur ekki fyrir aukaverkunum þurfi ekki að hafa áhyggjur, því bóluefnið geti vel virkað án þess að því fylgi aukaverkanir.

Um 109.000 manns höfðu í gær fengið að minnsta kosti fyrri sprautuna gegn COVID-19 sem er um 37,5% af þeim hópi sem áætlað er að bólusetja hér á landi. Þetta kemur fram í tilkynningu frá heilbrigðisráðuneytinu. 

„Þessi árangur uppfyllir markmið afléttingaráætlunar stjórnvalda og gott betur, þar sem gert er ráð fyrir að fyrri hluta maímánaðar verði hægt að taka skref til afléttingar ef a.m.k. 35% bólusetningarhópsins hefur fengið fyrri bólusetningarsprautuna. Heilbrigðisráðherra kynnti framvindu bólusetninga við COVID-19 á fundi ríkisstjórnarinnar í dag,“ segir í tilkynningunni.

20-30 þúsund skammtar í næstu viku

Þá segir að tillaga stjórnvalda um afléttingu í áföngum sé nú til umsagnar í samráðsgátt stjórnvalda. Áætlunin taki mið af framgangi bólusetningar en sé jafnframt birt með fyrirvara um mat sóttvarnalæknis á aðstæðum og stöðu faraldursins á hverjum tíma.

„Núgildandi reglugerð um takmarkanir á samkomum vegna farsóttar gildir til og með 5. maí nk. Sóttvarnalæknir hyggst senda tillögur sínar um framhald sóttvarnaaðgerða til heilbrigðisráðherra á næstu dögum með hliðsjón af framvindu faraldursins.

Búið er að bólusetja yfirgnæfandi meirihluta þeirra sem eru 60 ára og eldri og hluta fólks með undirliggjandi sjúkdóma. Rétt er að taka fram að það getur tekið um tvær vikur fyrir bóluefnið að ná fullri virkni og sú vernd sem fyrri skammtur gefur fólki er því ekki að fullu komin fram hjá öllum þessum hópi.

Áætlað er að bólusett verði með 20.000 til 30.000 skömmtum í næstu viku, þ.e. 3.-7. maí næstkomandi,“ segir í tilkynningunni.