Norðlendingar fá 4.000 skammta af bóluefni í næstu viku

23.04.2021 - 14:30
Mynd með færslu
 Mynd: Óðinn Svan Óðinsson - RÚV
Heilbrigðisstofnun Norðurlands fær fjögur þúsund skammta af bóluefni í byrjun næstu viku. Ætlunin er að fara langt með að klára að bólusetja alla sem eru fæddir 1961 eða fyrr. Bólusett verður með efnum frá Pfizer og Astra Zeneca.

Astra Zeneca og Pfizer

Þetta kemur fram tilkynningu frá Heilbrigðisstofnun Norðurlands í dag. Þar segir að bóluefnið frá Astra Zeneca verði nýtt til að hefja bólusetningu fólks sem fætt er 1961 og fyrr. Reiknað er með að fara langt með að klára að bólusetja þann hóp í næstu viku. 
Þá verður bóluefnið frá Pfizer nýtt í seinni bólusetningu þeirra voru bólusetir 6.-9 apríl og í fyrri bólusetningu hjá þeim sem eru yngri en 60 ára og hafa undirliggjandi sjúkdóma.

Fólk sem ekki á síma má mæta a slökkvistöðina

„Á Akureyri fer bólusetning þeirra sem ekki hafa hafið bólusetningu, og eru fæddir í árgöngum 1961 og fyrr, fram fimmtudaginn 29. apríl. Fólk sem fætt er í þessum árgöngum og hefur ekki farsíma og fær því ekki boð með sms er beðið um að mæta í bólusetningu á slökkvistöðina 29. apríl milli kl. 09-12,“ segir í tilkynningu. 

Á öðrum heilsugæslum í fjórðungnum fær fólk í þessum sömu hópum boð í bólusetningu með sms-skilaboðum eða með símtali þar sem tími og staðsetning kemur fram.