Athugið þessi frétt er meira en 5 mánaða gömul.

Gátu ekki tekið sýni úr dauðu gæsunum

Mynd með færslu
 Mynd: Rúnar Snær Reynisson - RÚV
Dánarorsök um 50 heiðagæsa sem fundust við Hvalnes í Lóni og í Suðurfjörum um helgina er óþekkt. Ekki var nægilegt hold á hræjunum til skimunar fyrir fuglaflensu.

Þetta kemur fram í tilkynningu frá Matvælastofnun, en fjallað var um málið hér á RÚV.is í gær. 

„Matvælastofnun barst tilkynning um fugladauðann frá Náttúrustofu Suðausturlands um helgina. Þegar eftirlitsmaður stofnunarinnar kom á staðinn á mánudag voru hræin upp étin þannig að ekki var hægt að taka sýni til rannsóknar á fuglaflensu. Stofnunin hefur verið í sambandi við heimamenn og verða sýni tekin ef fleiri fuglar finnast dauðir,“ segir í tilkynningu MAST. 

Jafnframt segir að vegna fuglaflensufaraldursins sem nú geisar í Evrópu sé mikilvægt fyrir stofnunina að fá tilkynningu um dauða fugla þegar orsök dauða þeirra er ekki augljós, svo sem þegar þeir fljúga á raflínur, rúður eða verða fyrir bíl. 

„Þau afbrigði fuglaflensuveiru sem nú herja á fugla í Evrópu eru ekki bráðsmitandi fyrir fólk en þó er ráðlegt að gæta almennra smitvarna, snerta ekki dauða fugla með berum höndum og tilkynna tafarlaust um fundinn. Veiran getur valdið miklum búsifjum hjá alifuglaeigendum og leitt til niðurskurðar á öllum fuglum. Mikilvægt er að alifuglaeigendur sinni smitvörnum,“ segir á vef MAST.