Athugið þessi frétt er meira en 5 mánaða gömul.

Krefjast upplýsinga og aðgerða vegna mengunar á Hofsósi

Mynd með færslu
 Mynd: RÚV - Björgvin Kolbeinsson
Byggðarráð Skagafjarðar gagnrýnir Umhverfisstofnun harðlega fyrir seinagang við rannsókn á bensínmengun á Hofósi. Brátt eru liðin tvö ár frá því mikill bensínleki uppgötvaðist úr birgðatanki N1 á Hofsósi.

Í desember 2019 neyddist fjölskylda á Hofsósi til að flytja úr húsi sínu vegna bensínmengunar sem rakin var til leka úr bensínstöð N1 í þorpinu. Þá var lyktarmengun í verslun KS á Hofsósi auk þess sem loka þurfti veitingastað á staðnum vegna sömu mengunar.

Nærri tvö ár frá því mengunarinnar varð fyrst vart

Þó brátt séu liðin tvö ár frá því bensínlekinn uppgötvaðist er rannsókn enn ekki lokið. „Og ég útiloka ekki að það séu fleiri fasteignir sem hafa lent þarna undir. Og svo við, sveitarfélagið sem eigandi lóða og gatna á svæðinu, við þurfum náttúruleg að gæta okkar hagamuna einnig,“ segir Sigfús Ingi Sigfússon, sveitarstjóri í Skagafirði.

Sveitarfélagið ekki fengið fullnægjandi upplýsingar

Í vikunni kallaði byggðarráð Skagafjarðar fulltrúa Umhverfisstofnunar á sinn fund til að afla upplýsinga um aðgerðir á Hofsósi, en Sigfús segir þar hafa verið fátt um svör. „En þeir fullvissuðu okkur um að þeir væru með málið í vinnslu og ætluðu að senda fulltrúa á svæðið nú í þessum mánuði. Við höfum ennþá ekki fengið upplýsingar um það í raun og veru hvert umfang og magn mengunar var og hvað á að gera til að bregðast við. Hvernig hreinsunarstarf á að eiga sér stað.“

Orðinn allt of langur tími í óvissu

Sveitarfélagið lét gera sjálfstæða rannsókn á menguninni og Sigfús segir hana hafa leitt í ljós bæði jarðvegsmengun og lyktarmengun upp úr holum. Því verði Umhverfisstofnun tafarlaust að skera úr um nauðsynlegar aðgerðir. „Og þetta er orðinn allt of langur tími sem bæði við og íbúar og fyrirtæki á svæðinu hafa fengið að vera bara í óvissu.“