Fiskidagurinn mikli blásinn af annað árið í röð

15.04.2021 - 12:32
Mynd með færslu
 Mynd: Bjarni Rúnarsson - RÚV
Stjórn Fiskidagsins mikla hefur ákveðið að fresta hátíðinni í ár vegna Kórónuveirufaraldursins. Ekki sé hægt að taka á móti viðlíka fjölda gesta með hólfaskiptingu og án þess að fólk felli grímuna til að gæða sér á fiskmeti.

Hátíðin er ein fjölmennasta bæjarhátíð sem haldin er ár hvert hér á landi og er jafnan haldin um miðjan ágúst sumar hvert. Á stjórnarfundi Fiskidagsins mikla 29. mars  var tekin ákvörðun um að fresta Fiskideginum mikla aftur.  

„Ákvörðinin er tekin að vel ígrunduðu máli. Við stefnum ótrauð á afmælishátíð í ágúst 2022. Fiskidagurinn mikli er þannig uppbyggður að við getum aldrei stjórnað fjölda þeirra gesta sem sækja okkur heim, við getum ekki skipt upp í hólf, ekki haft fjarlægðarreglur, og svo framvegis. Fiskidagurinn mikli sem er matarhátíð er ekki haldinn fyrr en grímunum hefur verið sleppt og ótakmarkaður gestafjöldi leyfður og að gestir geti knúsast áhyggjulaust að hætti Fiskidagsins mikla svo að fátt eitt sé nefnt. Það kostar mikla vinnu að skipuleggja svona stóra hátíð og óvissan er of mikil til þess að leggja af stað í þetta stóra verkefni. Við tökum enga áhættu og sýnum ábyrgð í verki, við teljum að það verði ekki kominn timi til að safna saman 30.000 manns eftir 3 mánuði,“ segir í tilkynningu frá forsvarsmönnum hátíðarinnar.

Stefnt er að því að fagna 20 ára afmæli hátíðarinnar sumarið 2022.