Athugið þessi frétt er meira en 5 mánaða gömul.

Skemmdir unnar á mosku í borginni Rennes í Frakklandi

11.04.2021 - 18:33
Mynd með færslu
 Mynd: AFP
Skemmdir voru unnar í gær á mosku og menningarsetur múslíma í borginni Rennes í vesturhluta Frakklands. Lögregluyfirvöldum í borginni var tilynnt um að skilaboð sem innihalda múslímahatur hefðu verið krotuð á veggi moskunnar en múslímar finna fyrir sífellt vaxandi andúð í Frakklandi.

Gerald Darmanin innanríkisráðherra fordæmir athæfið sem átti sér stað tveimur dögum fyrir upphaf Ramadan, föstuhátíðar múslíma. Nathalie Appere borgarstjóri og Valerie Boyer þingmaður taka undir fordæmingu ráðherrans.

Krotið á veggi moskunnar innihélt orðfæri sem beindist að trúarbrögðunum sjálfum, spámanninum Múhammeð og hvöttu til nýrra krossferða gegn múslímum. Jafnframt innihélt það kröfu um að kaþólska yrði tekin upp sem ríkistrú í Frakklandi.

Kaþólskir Evrópumenn héldu í krossferðir á seinni hluta miðalda í upphafi til að ná Jerúsalem úr höndum múslíma. Saksóknari í Rennes hefur með rannsókn málsins að gera en Mohammed Zaidouni forseti svæðisráðs múslíma í Rennes kveðst sleginn yfir athæfinu.

„Við erum börn lýðveldisins en stöndum frammi fyrir hatri, ofbeldi og villimennsku,“ sagði hann í samtali við AFP fréttastofuna. 

markusthth's picture
Markús Þ. Þórhallsson
Fréttastofa RÚV