Hópsmit líklega rakið til ferðalangs með mótefni

07.04.2021 - 11:58
Mynd: Almannavarnir / Ljósmynd
Fimm af sex kórónuveirusmitum sem greindust utan sóttkvíar í gær má rekja til hópsmits á Suðurlandi. Sóttvarnarlæknir segir líklegt að hópsmitið tengist landamærasmiti. Grunur er um að einstaklingur sem framvísaði vottorði á landamærum um að hann hafi verið með mótefni hafi smitast aftur af veirunni eftir komuna til landsins. 

„Þessi sem við teljum að gæti verið uppruni smitsins, það er einstaklingur sem var með vottorð erlendis frá um fyrri sýkingu. Og er reyndar með mótefni líka en greinist með veiruna. Þannig að spurningin er hvort hér sé um nýtt smit hjá einstaklingi sem hefur áður smitast eða ekki. Við  getum ekki alveg svarað því eins og staðan er núna,“ segir Þórólfur Guðnason sóttvarnarlæknir.

Ellefu kórónuveirusmit greindust innanlands í gær og sex þeirra sem greindust voru ekki í sóttkví. Svo mörg smit hafa ekki greinst innanlands síðan 23. mars.

„Sjötta smitið er einstaklingur á höfuðborgarsvæðinu sem greindist í viðtækri skimun hér í gær,“ segir Þórólfur. 

Ítarlegt  viðtal við Þórólf má heyra í spilaranum hér að ofan.