Tími Cocoa Puffs og Lucky Charms liðinn

31.03.2021 - 13:56
Mynd með færslu
 Mynd: Nathan and Olsen
Morgunkornstegundirnar Cocoa Puffs og Lucky Charms verða fljótlega ekki lengur fáanlegar á íslenskum markaði. Þetta kemur til vegna breytinga á uppskrift sem felur í sér viðbætt náttúrulegt litarefni sem samræmist ekki evrópulöggjöf sem gildir á Evrópska efnahagssvæðinu. General Mills hefur nýlega upplýst Nathan & Olsen, umboðsaðila sinn á Íslandi, um þetta.

„Þetta er auðvitað mjög leiðinlegt fyrir okkur og íslenska neytendur,“ er haft eftir Lísu Björk Óskarsdóttur, framkvæmdastjóra Nathan & Olsen, í fréttatilkynningu frá fyrirtækinu í dag.

„Bæði Cocoa Puffs og Lucky Charms hafa átt fastan sess á heimilum landsmanna um áratuga skeið og notið mikilla vinsælda fólks á öllum aldri. Þessar vörur, ásamt ýmsum öðrum frá Bandaríkjunum, eru eftirsóttar á Íslandi en hér hefur verið innleidd evrópulöggjöf sem getur verið hamlandi þegar kemur að því að bjóða neytendum fjölbreytt úrval af bandarískum vörum,“ segir hún.

General Mills vinnur þó að því að þróa aðrar lausnir í framleiðslu á vörum fyrir Evrópumarkað sem samræmast evrópskri löggjöf. 

 

hildurmj's picture
Hildur Margrét Jóhannsdóttir
Fréttastofa RÚV