Athugið þessi frétt er meira en 2 ára gömul.

Vill leiða lista Framsóknar í Suðvesturkjördæmi

29.03.2021 - 16:28
Willum Þór Þórsson, formaður fjárlaganefndar (B)
Willum Þór Þórsson, formaður fjárlaganefndar (B) Mynd: RÚV
Willum Þór Þórsson, þingmaður Framsóknar, gefur kost á sér til áframhaldandi forystu á lista Framsóknar í Suðvesturkjördæmi fyrir komandi Alþingiskosningar. Þetta kemur fram í tilkynningu frá honum en hann leiddi lista flokksins í kjördæminu fyrir fjórum árum.

„Á þessu kjörtímabili sem senn er að ljúka hef ég sinnt ábyrgðarstörfum meðal annars sem formaður fjárlaganefndar ásamt því að vera starfandi þingflokksformaður. Auk þess hef ég setið í efnahags- og viðskiptanefnd, allsherjar- og menntamálanefnd og forsætisnefnd. Kjörtímabilið hefur verið viðburðaríkt og óvenju krefjandi, held ég að sé óhætt að segja,“ segir í tilkynningunni. 

„Næstu misseri verða mikilvæg í viðspyrnunni og miklar áskoranir meðal annars á sviði efnahagsmála, ríkisfjármála og atvinnumála. Stór mál sem þarft að takast á við af ábyrgð, festu og skynsemi,“ segir þar jafnframt. „Ég trúi því að reynsla mín af þeim ábyrgðarstörfum sem mér hefur verið trúað fyrir komi að góðum notum við þær áskoranir sem framundan eru.“

Fylgi Framsóknarflokksins mældist 12,7 prósent í síðustu könnun MMR. Fylgið jókst um rúmt prósentustig milli mánaða. Stuðningur við ríkisstjórnina mældist 53,7 prósent.