Athugið þessi frétt er meira en 2 ára gömul.

Sérfræðingar rýna í jarðskjálfta á Þrengslasvæðinu

29.03.2021 - 18:50

Hamfarir · Innlent · Náttúra · Brennisteinsfjöll · Eldgos í Geldingadölum · Jarðhræringar á Reykjanesskaga · Jarðskjálftahrina á Reykjanesskaga · jarðskjálftar · Jarðskjálftar á Reykjanesskaga · Veðurstofa Íslands · Veðurstofan · Vísindaráð almannavarna · Þrengsli

Jarðhræringar, jarðskjálftamælir, Þorbjörn, Reykjanes, Suðurnes, Grindavíkurkaupstaður, Hraun, hraunbreiða, náttúra, Vetur, Vetrarveður, fallegt vetrarveður

Mynd: Birgir Þór Harðarson - RÚV

Sérfræðingar rýna nú í tvo nokkuð stóra jarðskjálfta sem urðu við Þrengslin síðastliðna nótt að sögn Böðvars Sveinsonar náttúruvársérfræðings á Veðurstofunni. Tveir skjálftar af stærðum 2,6 og 2,9 riðu þar yfir síðastliðna nótt.

Böðvar kveður alls óvíst enn hvaða þýðingu skjálftavirknin hafi en hún virðist hvorki tengjast niðurdælingum eða námuvinnslu á svæðinu. Skjálftavirkni hófst við Þrengsli aðfaranótt föstudags en Böðvar segir skjálftana eiga upptök sín á þriggja til sex kílómetra dýpi.

Að jafnaði sé ekki mikil skjálftavirkni nákvæmlega þar sem þeir urðu. Ekkert óvanalegt sé þó við að jörð skjálfi á þessu landsvæði. Annars segir Böðvar allt við það sama á gosstöðvunum og tiltölulega rólegt á öllum vígstöðvum, eins og er.

Í frétt RÚV í gær kom fram að Vísindaráð almannavarna telji enn líkur á því að skjálfti af stærðinni allt að 6,5 ríði yfir í Brennisteinsfjöllum. Á þeim slóðum hafi byggst upp spenna undanfarin ár sem gosið í Geldingadölum hafi ekkert náð að létta á.