Athugið þessi frétt er meira en 2 mánaða gömul.

Tilnefnd til Blaðamannaverðlaunanna

Mynd með færslu
 Mynd:
Tilnefningar til Blaðamannaverðlauna Blaðamannafélags Íslands voru tilkynntar í gær. Tilnefnt er í fjórum flokkum. Verðlaunahafar verða tilkynntir í næstu viku. RÚV fær fjórar tilnefningar til verðlauna í ár.

Fyrir umfjöllun ársins eru eftirfarandi tilnefndir: 

Birta Björnsdóttir og Guðmundur Björn Þorbjörnsson, RÚV.  Fyrir fjölbreytta, aðgengilega og upplýsandi umfjöllun af erlendum vettvangi sem vakið hefur athygli í þáttunum Heimskviðum.

Erla Björg Gunnarsdóttir og Nadine Guðrún Yaghi, Fréttastofa Stöðvar 2, Vísis og Bylgjunnar. Fyrir áhrifamikla og afhjúpandi umfjöllun Kompáss um dulinn vanda kvenna með þroskahömlun sem leiðst hafa út í vændi.

Sunna Ósk Logadóttir, Bára Huld Beck, Þórður Snær Júlíusson, Arnar Þór Ingólfsson og Jónas Atli Gunnarsson, Kjarnanum.  Fyrir vandaða og yfirgripsmikla umfjöllun um eldsvoðann á Bræðraborgarstíg 1 og margháttaðar afleiðingar hans.

Heimskviður má heyra hér.

Í flokki rannsóknarblaðamennsku ársins eru eftirfarandi tilnefningar:

Aðalsteinn Kjartansson, Helgi Seljan og Stefán Drengsson, RÚV. Fyrir fréttaskýringarþátt um afdrif tveggja gámaflutningaskipa sem Eimskip seldi í gegnum millilið til niðurrifs í Indlandi þvert á evrópsk lög.

Freyr Rögnvaldsson og Bjartmar Oddur Þeyr Alexandersson, Stundinni.  Fyrir fréttaflutning um plastmengun í Krýsuvík vegna moltudreifingar umhverfisfyrirtækisins Terra sem Samtök atvinnulífsins valdi umhverfisfyrirtæki ársins 2020. 

Nadine Guðrún Yaghi, Fréttastofa Stöðvar 2, Vísis og Bylgjunnar. Fyrir að afhjúpa umfangsmikil og afdrifarík mistök sem gerð voru við greiningar á leghálssýnum hjá Leitarstöð Krabbameinsfélagsins. 

Umfjöllun Kveiks um afdrif flutningaskipanna má sjá hér og hér.

Tilnefndar til Blaðamannaverðlauna ársins eru:

Hólmfríður Dagný Friðjónsdóttir, RÚV.  Fyrir umfjöllun um atvinnuleysi þar sem tekið var á sálrænum, félagslegum og fjárhagslegum afleiðingum þess í skugga heimsfaraldurs COVID-19. Hluti frétta Hólmfríðar má sjá hér að neðan:

Þórhildur Þorkelsdóttir, RÚV. Fyrir vönduð fréttatengd viðtöl þar sem sjónum er beint að einstaklingum í erfiðum aðstæðum.

Meðal frétta Þórhildar eru:

Björgunarafrek í Hafnarfirði:

Bataferli eftir bruna í Mávahlíð: 

Kynferðisbrot í skammtímavistun fyrir fatlaða 

Ofbeldi í sambandi 

 

Læknir á bráðamóttöku vanrækti skyldur sínar 

Sunna Karen Sigurþórsdóttir, Fréttastofa Stöðvar 2, Vísis og Bylgjunnar. Fyrir yfirgripsmiklar og áhrifaríkar fréttir sem fluttar voru beint af vettvangi af aurskriðunum á Seyðisfirði og afleiðingum þeirra. 

Fyrir viðtal ársins eru tilnefnd:

Erla Hlynsdóttir, DV.  Fyrir áhrifamikið viðtal við Elísabetu Ronaldsdóttur þar sem lýst er alvarlegu ofbeldi í nánu sambandi.

Hlédís Maren Guðmundsdóttir, Stundinni. Fyrir viðtal við fjórar ungar íslenskar konur sem eiga rætur að rekja til Asíu og lýsa kynferðislegum kynþáttafordómum í sinn garð allt frá grunnskólaaldri. 

Orri Páll Ormarsson, Morgunblaðinu. Fyrir viðtal við Ingva Hrafn Jónsson þar sem hann ræðir um andlát bróður síns og þá ákvörðun hans að þiggja dánaraðstoð.

Verðlaunin verða veitt í næstu viku.