Athugið þessi frétt er meira en 2 mánaða gömul.

Fundað með Almannavörnum vegna skjálftanna í nótt

Staðan á Reykjanesskaga kl. 05.25 7. mars 2021
 Mynd: Veðurstofa Íslands
Fulltrúar Almannavarnadeildar Ríkislögreglustjóra, Veðurstofunnar, Lögreglunnar á Suðurnesjum og Grindavíkurbæjar hittust á fundi klukkan hálf fjögur í nótt vegna jarðskjálftahrinu næturinnar.

Í tilkynningu frá Almannavörnum segir að fjöldi skjálfta á bilinu 3 - 5 að stærð hafi orðið á svæðinu frá Fagradalsfjalli að fjallinu Þorbirni, sem er í túnfætinum hjá Grindvíkingum, og fólk þar í bæ því skiljanlega órólegt.

Hræringarnar líklega ekki „skammtímafyrirboði eldgoss“

Fram kemur að líklegast þyki að skjálftarnir séu „afleiðingar spennubreytinga í jarðskorpunni, en ekki vegna tilfærslu á kviku. Það er því ekki metið sem svo að þeir séu skammtímafyrirboði eldgoss."

Ennfremur segir að mannskapur frá Vegagerðinni og Lögreglunni á Suðurnesjum sé að kanna hvort skemmdir hafi orðið á vegum, og að staðan verði endurmetin í fyrramálið. 

Tilkynning Almannavarnadeildar Ríkislögreglustjóra í heild:

Almannavarnadeild Ríkislögreglustjóra og Veðurstofa Íslands funduðu ásamt Lögreglunni á Suðurnesjum og fulltrúa Grindavíkurbæjar kl. 03.30 í nótt vegna fjölda jarðskjálfta af stærðinni 3-5 á svæðinu frá Þorbirni að Fagradalsfjalli. Jarðskjálftarnir finnast vel í Grindavík og fólk er skiljanlega órólegt.

Líklegast er að skjálftarnir sem finnast núna í Grindavík séu afleiðingar spennubreytinga í jarðskorpunni, en ekki vegna tilfærslu á kviku. Það er því ekki metið sem svo að þeir séu skammtímafyrirboði eldgoss.

Áfram má búast við jarðskjálftum í nótt sem finnast vel í Grindavík. Náttúruvásérfræðingar Veðurstofunnar og Almannavarnadeild fylgjast vel með þróun mála í nótt.

Vegagerðin og Lögreglan á Suðurnesjum eru á ferð og kanna hvort skemmdir hafi orðið á vegum. Staðan verður endurmetin í fyrramálið.

Ævar Örn Jósepsson
Fréttastofa RÚV