Athugið þessi frétt er meira en 4 mánaða gömul.

Biður fólk að hætta þessu COVID-væli

epa09034879 The President of Brazil Jair Bolsonaro during the ceremony of approval of the Central Bank Autonomy Law, in Brasilia, Brazil, 24 February 2021. Brazilian President Jair Bolsonaro renewed his Government with changes in two ministries and sanctioned a law that gives autonomy to the Central Bank, which is part of his objective of liberalizing the country's economy.  EPA-EFE/Joedson Alves
 Mynd: EPA-EFE - EFE
Jair Bolsonaro, forseti Brasilíu, hvetur landsmenn til að hætta öllu COVID-væli. Þrettán hundruð manns hafa dáið af völdum farsóttarinnar að meðaltali síðustu daga.

Bolsonaro lét þessi orð falla þegar hann tók formlega í notkun nýja járnbrautarlínu í ríkinu Goais í gær. Hann spurði hversu lengi fólk ætlaði að halda áfram að væla, hanga heima og halda öllu lokuðu.

Forsetinn hefur jafnan verið gagnrýninn á ráðleggingar heilbrigðisyfirvalda og ráðstafanir stjórnvalda til að halda aftur af COVID-19 plágunni, kallað hana smávegis flensu, mótmælt notkun hlífðargríma og gert grín að bólusetningum sem hann sagði að breyttu fólki í krókódíla. Sjálfur mælir hann með hýdroxýklórókín gegn veirunni, þótt rannsóknir sýni að það sé vita gagnslaust. Bolsonaro veiktist af COVID-19 í sumar. Hann var heima í hálfan mánuð og hefur ekki kennt sér meins síðan. 

Yfir 260 þúsund Brasilíumenn hafa dáið af völdum veirunnar, fleiri en nokkurs staðar annars staðar að frátöldum Bandaríkjunum. Síðasta vika hefur verið einkar mannskæð, þegar þrettán hundruð COVID-19 sjúklingar hafa látist á hverjum sólarhring að meðaltali. Um er að kenna afbrigði veirunnar sem á uppruna sinn í Amazon-regnskógunum og hefur verið kennt við Brasilíu.