Athugið þessi frétt er meira en 5 mánaða gömul.

Armenía dregur sig úr Eurovision

Mynd með færslu
 Mynd: eurovision.tv

Armenía dregur sig úr Eurovision

05.03.2021 - 11:53

Höfundar

Armenar taka ekki þátt í Eurovision í ár. Mikil ólga er í landinu eftir stríðsátök við Aserbaísjan og sér ríkisútvarp Armena sér ekki fært að senda atriði í keppnina eins og ástandið er.

Í tilkynningu frá ríkisútvarpi Armena, AMPTV, segir að þrátt fyrir bestu viðleitni verði þeim ekki mögulegt að taka þátt í Söngvakeppni evrópskra sjónvarpsstöðva í ár. Of skammur tími sé til stefnu og vegna nýlegra atburða geti það ekki sent atriði í keppnina.

Mikil ólga hefur verið í Armeníu síðan forsætisráðherra landsins undirritaði friðarsamkomulag við Asera í nóvember eftir sex vikna stríð þar sem um sex þúsund manns féllu. Alþjóðlegu mannréttindasamtökin Amnesty International segja stríðsglæpi hafa verið framda í átökunum.

Armenía hefur einu sinni áður dregið sig úr keppninni. Það var árið 2012 eftir átök á landamærunum við Aserbaísjan.

Martin Österdahl, framkvæmdastjóri Eurovision, segir að tíðindin séu afar hryggileg. „Armenía hefur átt góðu gengi að fagna í keppninni og hefur ávallt boðið upp á vönduð og spennandi atriði á sviðinu. Við höfum skilning á því að þau dragi sig úr keppninni og eigum eftir að sakna harðduglegrar og fagmannlegrar sendinefndar Armena í Rotterdam. Við vonumst innilega til að geta boðið Armena velkomna aftur 2022.“

Fjörutíu lönd eru enn í keppninni. Til stendur að hún fari fram dagana 18.-22. maí í Rotterdam í Hollandi.

Tengdar fréttir

Erlent

Allt á suðupunkti í Armeníu

Stjórnmál

Amnesty sakar Asera og Armena um stríðsglæpi

Stjórnmál

Armenía: „Umtalsvert mannfall“ í átökunum við Asera