Athugið þessi frétt er meira en 1 mánaða gömul.

Vísindaráð dregur upp mögulegar sviðsmyndir

Mynd með færslu
 Mynd: Grímur Jón Sigurðsson - RÚV
Á fundi Vísindaráðs almannavarna sem lauk nú á sjötta tímanum voru mögulegar sviðsmyndir sem snúa að kvikuinnskoti undir svæðinu við Fagradalsfjall ræddar. Meðal þeirra eru að það dregur úr jarðskjálftavirkni næstu daga eða vikur, hrinan mun færast í aukana með stærri skjálftum, allt að 6 að stærð, í nágrenni við Fagradalsfjall, skjálfti af stærð allt að 6.5 verður sem á sér upptök í Brennisteinsfjöllum og kvikuinnskot haldi áfram í nágrenni við Fagradalsfjall.

Verði af því síðastanefnda eru tveir möguleikar: annars vegar að kvikuinnskotsvirkni minnkar og kvika storknar og hins vegar að leiða mun til flæðigoss með hraunflæði sem mun líklega ekki ógna byggð.

Á fundinum sátu fulltrúar frá Veðurstofu Íslands, Háskóla Íslands, Umhverfisstofnun, Isavia-ANS, HS-Orku og ÍSOR. Fram kom að sjálfvirka jarðskjálftakerfi Veðurstofunnar hefur mælt um 1.800 skjálfta frá miðnætti og eru þeir að mestu bundnir við svæði SV af Keili og Trölladyngju. Af þessum 1.800 eru 23 skjálftar að stærð 3 eða stærri og um 3 skjálftar eru 4 að stærð eða stærri. Sá stærsti frá miðnætti mældist kl. 16:35, 5,1 að stærð, 4,9 og átti hann upptök um 1 km ASA við Keili.

Vísindaráð fór einnig yfir  gervihnattamyndir (InSAR) sem bárust í dag. Úrvinnsla úr þeim myndum sýna  meiri færslu en áður hefur orðið vart við á svæðinu síðustu daga. Líklegasta skýringin er sú að kvikugangur sé að myndast undir því svæði þar sem mesta jarðskjálftavirknin hefur verið síðustu daga. Unnið verður betur úr þessum nýju gögnum m.a. með líkangerð til þess að varpa skýrara ljósi á framvindu mála.

Í tilkynningu frá almannavörnum segir að núverandi virkni á Reykjanesskaga sé kaflaskipt og er erfitt að spá fyrir um nákvæma framvindu. Von er á nýjum gögnum síðar í vikunni sem geta varpað skýrara ljósi á ástæður þessarar hrinu. Vísindaráð mun funda aftur á morgun til að leggja frekara mat á þau gögn sem liggja fyrir.