Mynd: Flickr
Athugið þessi frétt er meira en 2 mánaða gömul.
Hundruð tilnefninga til friðarverðlauna Nóbels
Norsku Nóbelsnefndinni hafa borist 329 tilnefningar til friðarverðlauna Nóbels í ár. Þeirra á meðal eru Greta Thunberg, aðgerðasinni í loftslagsmálum, og Donald Trump, fyrrverandi Bandaríkjaforseti. Sömu leiðis Svetlana Tikhanovskaya, forsetaframbjóðandi í Hvíta-Rússlandi og rússneski stjórnarandstæðingurinn Alexei Navalny.
Nefndinni ber að halda nöfnum hinna tilnefndu leyndum í hálfa öld, en ýmsir kjósa þó að upplýsa hvern þeir hafi tilnefnt. Nokkrar stofnanir eru meðal tilnefndra í ár, svo sem Alþjóðaheilbrigðisstofnunin, Gavi, alþjóðleg baráttusamtök fyrir bólusetningum, Fréttamenn án landamæra og Samtökin til verndar fréttamönnum, CPJ.
Nóbelsnefndin tilkynnir 8. október hverjum hlotnast friðarverðlaunin. Handhafi þeirra í fyrra var Matvælaáætlun Sameinuðu þjóðanna.
