Athugið þessi frétt er meira en 1 mánaða gömul.

„Ég hef reynt að segja þeim að þetta sé of flókið“

Mynd: - / RÚV

„Ég hef reynt að segja þeim að þetta sé of flókið“

01.03.2021 - 14:04

Höfundar

Davíð Kjartan Gestsson

vefritstjórn

Senda skilaboð

Það eru margir utanaðkomandi þættir sem skipta máli í samsetningu Eurovision-atriðis Daða og Gagnamagnsins. Að baki sjónarspilinu er einn í fjölskyldunni sem sér um að skrúfa, bora og negla saman hljóðfæri og búninga.

„Ég myndi algjörlega segja að hann sé mikilvægur partur af Gagnamagninu,“ segir Daði Freyr Pétursson um Ásmund Lárusson, bónda á Norðurgarði á Skeiðum sem er pabbi Árnýjar Fjólu í Gagnamagninu. „Þetta er ekki bara við sex þó að við séum að gera mest.“

Ásmundur aðstoðar sveitina nefnilega við að smíða hljóðfærin og búningana. „Ég hef reynt að segja að þetta sé of flókið,“ segir hann en það hafi hins vegar lítil áhrif. „Þá yfirleitt klórum við okkur út úr því, einhvern veginn.“

Skyggnst var inn í skúr hjá Ásmundi í nýjum heimildarþætti um Daða og Gagnamagnið á RÚV.

Ásmundur segist nýta það sem er hendi næst við gerð hljóðfæranna og búninganna, eins og bjórkassa, umbúðir utan af kaffi og plastmottur. „Þetta er fengið héðan og þaðan úr ruslinu eða því sem næst, sko. Gamalt parket og hátalari og svona.“

Mynd: - - RÚV

„Ég get ekki ímyndað mér hvar þau ætla að hafa þetta. Ég hélt að hausinn hans væri hér.“

Daði Freyr segir að hann og Árný geti eytt hálfum degi í að sjá fyrir sér hvað þau ætli að gera. „Svo kemur hann og hálftíma seinna þá er bara búið að smíða það.“

Daði Freyr Pétursson og félagar í Gagnamagninu flytja framlag Íslands í Eurovision í ár. Í nýjum heimildarþáttum er farið yfir sögu hópsins hingað til og fylgst með undirbúningi fyrir keppnina í Rotterdam.