Athugið þessi frétt er meira en 4 mánaða gömul.

Vilja kaupa eða byggja 359 leiguíbúðir

23.02.2021 - 16:03
Meðfylgjandi eru myndir af húsum sem byggð hafa verið fyrir stofnframlög og þar sem fólk er þegar flutt inn í leiguíbúðirnar. Um er að ræða fjölbýlishús við Móaveg og Urðarbrunn í Reykjavík og Asparskóga á Akranesi.
 Mynd: Aðsend mynd - Íbúðalánasjóður
Bjarg íbúðafélag, Brynja hússjóður og Félagsbústaðir sendu inn umsagnir til Reykjavíkurborgar um stofnframlög til að kaupa eða byggja leiguíbúðir fyrir tekju- og eignalitlar fjölskyldur. Umsóknarfrestur rann út í gær. Umsóknirnar eru vegna átta verkefna sem snúa að byggingu eða kaupum á samtals 359 íbúðum. Félögin vilja kaupa 214 íbúðir og byggja 145 til viðbótar.

Næstu skref eru að matsnefnd fer yfir umsóknirnar og gerir tillögu til borgarstjóra um hvernig umsóknirnar verða afgreiddar. Áður en ákvörðun verður tekin þarf Húsnæðis- og mannvirkjastofnun að meta umsóknir. 

Bjarg íbúðafélag er húsnæðissjálfseignarstofnun sem ASÍ og BSRB stofnuðu. Brynja hússjóður er sjálfseignarstofnun á vegum Öryrkjabandalags Íslands. Félagsbústaðir eru fyrirtæki í eigu Reykjavíkurborgar sem hefur umsjón með uppbyggingu og rekstri félagslegs húsnæðis.

Yfirlýst markmið með stofnframlögum til kaupa eða byggingar á leiguíbúðum er að efla leigumarkaðinn og styrkja stöðu fólks undir tekju- og eignamörkum. Í stefnumótun Reykjavíkurborgar segir að með þessu eigi stuðla að framboði leiguíbúða á viðráðanlegu verði fyrir námsmenn, ungt fólk, aldraða, fatlað fólk og fólk sem ekki er fært um að sjá sér fyrir húsnæði vegna félagslegra aðstæðna eða verulegs fjárhagsvanda.