Blikar höfnuðu tilboði frá norsku liði í Brynjólf

Mynd með færslu
 Mynd: Mummi Lú - RÚV

Blikar höfnuðu tilboði frá norsku liði í Brynjólf

23.02.2021 - 10:55
Nokkur lið í Skandinavíu hafa sýnt mikinn áhuga á því að fá Brynjólf Andersen Willumsson, leikmann Breiðabliks í Pepsi Max-deild karla í fótbolta, í sínar raðir. Breiðablik hefur þegar hafnað einu tilboði frá norsku félagi í leikmanninn.

Þetta kemur fram í frétt fótbolta.net en þar staðfestir Sigurður Hlíðar Rúnarsson, deildarstjóri knattspyrnudeildar Breiðabliks, að áhugi félaga á Norðurlöndum á Brynjólfi sé mikill. 

Brynjólfur er fæddur árið 2000 og verður því 21 árs á árinu. Hann skoraði sex mörk í 19 leikjum í deild og bikar fyrir Blika á síðustu leiktíð. Hann hefur alls skorað tíu mörk í 51 meistaraflokksleik fyrir Breiðablik á ferlinum.

Brynjólfur er yngri bróðir Willums Þórs Willumssonar sem leikur sem atvinnumaður með BATE Borisov í Hvíta-Rússlandi. Brynjólfur hefur leikið 12 landsleiki fyrir undir 21 árs landslið Íslands sem keppir á EM í lok mars.