Hærri dánartíðni í Evrópu árið 2020

22.02.2021 - 12:04
Mynd: EPA-EFE / EFE
Rúmlega 40 prósentum fleiri létust í ESB- og EFTA-ríkjum í nóvember í fyrra en fjögur árin á undan. Þá náði önnur bylgja COVID-19 hámarki. Andlát umfram meðaltal er 1,6 prósent á Íslandi samkvæmt bráðabirgðatölum sem Hagstofa Evrópusambandsins, Eurostat, hefur birt um andlát í ríkjum sambandsins og EFTA-ríkjunum Íslandi, Noregi, Liechtensten og Sviss árið 2020. Þar má glöggt sjá áhrif COVID-19 faraldursins. Dánartíðni í Evrópulöndum 25 prósentum hærri í apríl er fyrsta bylgjan var í hámarki.

Margir gamlir létust í Svíþjóð

Tæplega 100 þúsund manns létust í Svíþjóð í fyrra sem er nærri átta prósentum meira en að meðaltali 2016-2019. Í hópi fólks sem er eldra en 75 ára var dánartíðnin í Svíþjóð í fyrra meir en 20 prósentum hærri en að meðaltali fjögur árin á undan.

Dánartíðni í Svíþjóð undir meðaltali í Evrópu

Sænskir miðlar segja að tölur Eurostat sýni að því fari fjarri að faraldurinn hafi leikið Svía harðar en aðrar Evrópuþjóðir. Fredrik Charpentier Ljungqvist, lektor við Stokkhólmsháskóla, segir að dánartíðnin í Svíþjóð sé raunar undir meðaltali Evrópuríkja. Það er hins vegar óumdeilt að Svíar hafa farið langverst Norðurlandaþjóða út úr COVID-19 faraldrinum.

Hlutfallslega flestir létust í Liechtenstein

Hlutfallslega flestir létust í Liechtenstein samkvæmt tölum Eurostat, þar var dánartíðni 20 prósentum hærri 2020 en fjögur árin á undan. Af fjölmennari ríkjum er dánartíðnin á Spáni og í Póllandi litlu minni. Andlát umfram meðaltal er 1,6 prósent á Íslandi og í Danmörku, en í Noregi létust núll komma fjórum 0,4 prósentum færri í fyrra en árin 2016-2019.
 

 

bogia's picture
Bogi Ágústsson
Fréttastofa RÚV