Nýr heilbrigðisráðherra tók við embætti í Argentínu í gær. Forveri hennar hrökklaðist úr embætti þegar í ljós kom að vinir og vandamenn höfðu fengið bólusetningu á undan forgangshópum. Upp komst um málið þegar þekktur blaðamaður sagðist hafa fengið sprautu eftir að hafa einfaldlega óskað eftir því við heilbrigðisráðherrann. Í Perú hefur komið á daginn að minnst 500 manns sem voru ekki á forgangslista fengu samt sem áður bólusetningu í leyni. Þeirra á meðal fyrrum forseti landsins og nokkrir fyrrverandi ráðherrar.
En það eru ekki bara ráðamenn og fyrirmenni sem reyna að svindla sér fram fyrir forgangshópa. Lögreglan í Flórída í Bandaríkjunum rannsakar nú hvernig tveimur konum tókst að fá fyrri sprautuna af bóluefni. Konurnar eru 34 og 44 ára en þær fölsuðu persónuskilríki sín klæddu sig í hanska og settu á sig hatta og gleraugu. Lögreglan var kölluð til þegar starfsfólk áttaði sig á dulargervinu.
