Athugið þessi frétt er meira en 4 mánaða gömul.

Kielsen ætlar enn á þing fyrir Siumut

20.02.2021 - 07:39
Kosningaplakat Siumut í þingkosningunum á Grænlandi 2018, mynd af Kim Kielsen, formanni flokksins
 Mynd: Danmarks Radio - DR
Kim Kielsen, fráfarandi leiðtogi grænlensku landsstjórnarinnar og fyrrverandi formaður Siumut-flokksins, er hvergi nærri hættur í stjórnmálum þótt meirihluti flokkssystkina hans hafi hafnað honum sem formanni fyrir skemmstu. Hann segist í samtali við grænlenska blaðið Sermitsiaq ætla að bjóða sig fram fyrir Siumut í þingkosningunum í apríl.

Í frétt blaðsins segist hann telja sig skuldbundinn kjósendum til að standa sína plikt, svo lengi sem hann hafi áhuga og orku til að vinna í þeirra þágu. Kielsen, sem er hálfsextugur, fékk 2.183 persónuatkvæði í kosningunum 2018 og átti stóran þátt í því að tryggja Siumut nauman sigur yfir erkifjendunum í Inuit Ataqatigiit, með 7.957 atkvæðum gegn 7.478.

Umdeildur þungavigtarmaður

Hann hefur verið þungavigtarmaður í grænlenskum stjórnmálum um langt árabil og formaður Siumut-flokksins síðan 2014. Nokkurrar óánægju var þó tekið að gæta með forystu Kielsens í flokknum og á haustdögum tapaði hann formannskosningum gegn áskorandanum Erik Jensen.

Kielsen neitaði engu að síður að víkja úr forsæti landsstjórnarinnar, sem liðaðist að lokum í sundur fyrir rúmri viku. Í framhaldinu var boðað til þingkosninga samhliða sveitarstjórnarkosningunum 6. apríl næstkomandi, þótt ár lifi af kjörtímabilinu.