Athugið þessi frétt er meira en 2 mánaða gömul.

Þúsundir mótmæla handtöku rappara á Spáni

epa09019722 Protesters clash with riot police officers during a march to condemn the imprisonment of Spanish rapper Pau Rivadulla Duro A.K.A 'Pablo Hasel' in Barcelona, Spain, 17 February 2021 Hasel was given a nine-month-prison sentence late January after the Supreme Court found him guilty of praising terrorism and defamation against Spanish Crown and state institutions on his song lyrics.  EPA-EFE/Enric Fontcuberta
 Mynd: EPA-EFE - EFE
Til harðra átaka kom milli mótmælenda og lögreglu í Barcelona og Madríd á miðvikudagskvöld, eftir handtöku rapparans Pablo Hasél. Hasél, sem var dæmdur fyrir að móðga spænsku konungsfjölskylduna og hvetja til hryðjuverka, var handtekinn síðdegis á þriðjudag. Þá strax brutust út harkaleg mótmæli í nokkrum borgum, sem víða þróuðust út í átök og óspektir. Grímuklæddir mótmælendur köstuðu flöskum og öðru lauslegu að óeirðalögreglu, veltu ruslatunnum og reistu götuvígi.

Fjölmennustu og hörðustu mótmælin í Barcelona

Mótmæli héldu áfram á miðvikdag og fram á kvöld og voru bæði fjölmennust og hörðust í Barcelona, þar sem þúsundir fóru um götur og mótmæltu þeirri árás á tjáningarfrelsið, sem dómurinn yfir rapparanum er sagður vera. Hasél er listamannsnafn hins 32 ára gamla Pau Rivadulla.

Hann var dæmdur í níu mánaða fangelsi fyrir að hafa farið  niðrandi orðum um konungsfjölskylduna og ýmsar ríkisstofnanir, og fyrir að upphefja hryðjuverk. Hann átti að mæta til afplánunar á föstudag en lét ekki sjá sig, heldur lokaði sig inni í háskólanum í Lleida í Katalóníu. Á þriðjudag réðist lögreglan til atlögu og sótti hann inn í háskólann með valdi. „Það er fasistaríkið sem handtekur mig. Dauða yfir fasistaríkinu!“ hrópaði Hasél þegar hann var leiddur út úr háskólanum í lögreglufylgd.

Listamenn og Amnesty International fordæmda dóminn

Hundruð spænskra listamanna, með leikstjórann Pedro Almodóvar, leikarann Javier Bardem og söngvarann Joan Manuel Serrat í fylkingarbrjósti, hafa lýst stuðningi við Hasél og fordæmt dóminn yfir honum og árás yfirvalda á tjáningarfrelsið. Mannréttindasamtökin Amnesty International hafa líka látið sig varða mál rapparans Pablos Hásél. Í yfirlýsingu frá samtökunum segir að  fangelsun hans á grundvelli söngtexta og twitter-færslna sé óforsvaranleg.