Athugið þessi frétt er meira en 3 mánaða gömul.

Hættustigi aflýst á Seyðisfirði

Mynd með færslu
 Mynd: Hjalti Stefánsson - RÚV
Hættustigi hefur verið aflýst á Seyðisfirði og óvissustigi vegna ofanflóða á Austfjörðum hefur verið aflýst. Þá hefur rýmingu verið aflétt á þeim íbúðarhúsum sem voru rýmd í gær og geta íbúar þeirra snúið aftur til síns heima. Þetta kemur fram í tilkynningu frá almannavarnadeild ríkislögreglustjóra og lögreglustjóranum á Austurlandi. Ekki er talið að grípa þurfi til sambærilegrar rýmingar á Seyðisfirði nema úrkoma og leysing verði nokkru meiri en nú varð.

Húsin sem rýmd voru í gær og rýmingu hefur nú verið aflétt á eru:

  • Öll hús við Botnahlíð
  • Múlavegur 37
  • Baugsvegur 5
  • Austurvegur 36, 38b, 40b, 42, 44, 44b, 46b, 48, 50, 52,  54 og 56
  • Fossgata 4, 5 og 7
  • Múli, Hafnargata 10, 11, 12, 14, 15, 16b og 18c

Engar skriður hafa fallið á Seyðisfirði frá því á mánudag. Verulega hefur dregið úr rigningu og gert er ráð fyrir úrkomulitlu og kólnandi veðri fram á föstudag.

„Mælingar í borholum í Neðri-Botnum sýndu nokkuð hraða hækkun á vatnsborði á sunnudag en nú hefur dregið úr henni. Mælingar á hreyfingu jarðlaga með alstöð og sjálfvirkum GPS stöðvum sýna enga markverða hreyfingu. Það er góðs viti að þetta veður skuli ekki hafa valdið óstöðugleika í jarðlögum hlíðarinnar og þess vegna er ekki reiknað með því að það þurfi að grípa til sambærilegrar rýmingar á Seyðisfirði nema úrkoma og leysing verði nokkru meiri en nú varð. Mælitæki til þess að vakta aurskriðuhættu í hlíðinni, sem komið hefur verið fyrir á undanförnum vikum, reyndust vel,“ segir í tilkynningunni.