Athugið þessi frétt er meira en 2 mánaða gömul.

Bensínlítri hefur hækkað um nærri 11 krónur undanfarið

17.02.2021 - 09:15
Erlent · Innlent · Bensín · eldsneytisverð · FÍB · Íran · Jemen · Olíuverð · OPEC · Sádi Arabía · umferð · Neytendamál
Mynd með færslu
 Mynd: Shutterstock
Bensínverð á Íslandi hefur hækkað um allt að 11 krónur síðustu vikur og dísilolía um 9 krónur lítrinn. Þetta kemur fram á vef FÍB. Skýringa er að leita á hráolíumarkaðinum en verð á Brent hráolíu var í upphafi vikunnar það hæsta sem sést hefur í meira en eitt ár.

Á vef FÍB segir að Samtök olíuútflutningsríkja (OPEC) með Sáda í broddi fylkingar hafi dregið úr olíuframleiðslu. Það megi rekja til þess að Íran og Sádi Arabía hafi styrkt andstæðar fylkingar í borgarastyrjöldinni í Jemen.

Eftirspurn eftir olíu hafi sömuleiðis aukist vegna bjartsýni um að nú sjái fyrir endann á COVID-19 faraldrinum, einkum í Asíu. Morgunblaðið greinir frá því í dag að hæsta bensínlítraverð á Íslandi nálgist nú 240 krónur, án tillits til afsláttarkjara.

Verðið fór yfir 240 krónur í janúar á síðasta ári en lækkaði fljótt og mikið næstu mánuðina á eftir að því er fram kemur á vefnum Gasvaktin. Eftir mitt ár tók eldsneytisverð að hækka að nýju.

Hæsta dísilolíuverð á höfuðborgarsvæðinu núna er tæpar 226 krónur samkvæmt upplýsingum á vef FÍB.