Athugið þessi frétt er meira en 4 mánaða gömul.

Óli Halldórsson leiðir lista VG í Norðausturkjördæmi

Mynd með færslu
 Mynd: Facebook - Vinstri græn
Óli Halldórsson, forstöðumaður Þekkingarnets Þingeyinga, varð í efsta sæti í forvali Vinstri hreyfingarinnar græns framboðs í Norðausturkjördæmi fyrir komandi alþingiskosningar. Bjarkey Olsen Gunnarsdóttir, alþingismaður og þingflokksformaður Vinstri grænna, hafnaði í öðru sæti.

Rafrænt forval VG fór fram 13.-15. febrúar. Þar var valið í fimm efstu sæti á framboðslista flokksins í alþingiskosningunum sem fram fara í haust. Tólf voru í framboði.

1. Óli Halldórsson með 304 atkvæði í 1. sæti
2. Bjarkey Olsen Gunnarsdóttir með 293 atkvæði í 1.-2. sæti
3. Jódís Skúladóttir með 297 atkvæði í 1.-3. sæti
4. Kári Gautason með 337 atkvæði í 1.-4. sæti
5. Jana Salóme Ingibjargar Jósepsdóttir með 322 atkvæði í 1.-5. sæti

Óli Halldórsson tekur því við sem oddviti Vinstri grænna í Norðausturkjördæmi af Steingrími J. Sigfússyni, sem gaf ekki kost á sér. Bjarkey Olsen Gunnarsdóttir, sem sóttist líka eftir fyrsta sæti, segir þetta mikil vonbrigði. Hún ætli að hugsa sína stöðu og íhuga hvort hún taki sæti á listanum.

Þá vekur athygli að Ingibjörg Þórðardóttir, varaþingmaður og ritari Vinstri grænna, er ekki í einu af efstu fimm sætunum. Hún bauð sig fram í 1.-2. sæti.