Athugið þessi frétt er meira en 8 mánaða gömul.

Mótmæla lokun Arion banka á Blönduósi

12.02.2021 - 10:19
Mynd með færslu
 Mynd: RÚV - Jóhannes Jónsson
Sveitarstjórn Blönduósbæjar mótmælir harðlega fyrirhugaðri lokun á útibúi Arion banka á Blönduósi. Sveitarstjórn ætlar að endurskoða viðskipti sín við bankann.

Arion banki hefur tilkynnt þá ákvörðun að loka útibúi bankans á Blönduósi 5. maí og sameina það útibúinu á Sauðárkróki. Áfram verði hraðbanki á Blönduósi. Fulltrúar Arion banka kynntu sveitarstjórn Blönduósbæjar þessar hugmyndir á fundi á þriðjudag.

Í bókun sem sveitarstjórn sendi frá sér eftir þann fund er lokun útibúsins á Blönduósi harðlega mótmælt. „Þjónusta bankans hefur verið skert verulega á undanförnum árum og var sú þróun hafin áður en heimsfaraldur Covid19 kom til. Sveitarstjórn lýsir yfir miklum vonbrigðum yfir skertri fjármálaþjónustu við íbúa og fyrirtæki í sveitarfélaginu og nágrenni, auk þeirra fjölmörgu sem hingað koma eða fara um,“ segir meðal annars í bókuninni.

„Sveitarstjórn felur sveitarstjóra, í samráði við byggðaráð að kanna og koma með tillögur um frekari viðbrögð við boðaðri lokun bankans, með tilliti til framtíðar bankaviðskipta sveitarfélagsins.“