Athugið þessi frétt er meira en 1 ára gömul.

Allir fæddir 1931 eða fyrr boðaðir í bólusetningu í dag

Mynd með færslu
 Mynd: Lögreglan
Heilsugæsla höfuðborgarsvæðisins býður öllum 90 ára og eldri í bólusetningu í dag. Það eru þeir sem eru fæddir árið 1931 eða fyrr. Heilsugæslan hefur boðað um það bil þúsund manns í bólusetningu í dag með SMS-skilaboðum í síma. Þeir sem eru á þessum aldri og búa á hjúkrunarheimilum hafa langflestir nú þegar verið bólusettir.

Allir sem eru á þessum aldri en hafa ekki fengið boð geta mætt í bólusetningu á Suðurlandsbraut 34, milli klukkan níu og þrjú í dag. Ragnheiður Ósk Erlendsdóttir, framkvæmdastjóri hjúkrunar á heilsugæslunni, segir í samtali við fréttastofu að þeir sem komist alls ekki í dag geti komið síðar:

„Þannig að fólk þarf ekki að örvænta, það er ekki búið að missa plássið sitt. Þegar maður er einu sinni búinn að fá boð í bólusetningu, þá á maður rétt á bólusetningu,“ segir hún.

Bólusetning fer fram í opnu rými á Suðurlandsbraut 34. Ragnheiður segir að fólk þurfi að hafa grímu og skilríki og að bólusett sé í axlarvöðva.

„Þetta er allt á Suðurlandsbraut, þar erum við að blanda og þar erum við búin að koma okkur upp mjög góðu húsnæði með fullt af rýmum og fullt af stólum. Fólk kemur inn og er stýrt í ákveðin herbergi þar sem það fær sér sæti og bíður í 15 mínútur eftir að það er búið að fá sprautuna,“ segir hún.