Athugið þessi frétt er meira en 5 mánaða gömul.

Leggja til hertar sóttvarnir vegna fuglaflensufaraldurs

Mynd með færslu
 Mynd: TV2
Matvælastofnun leggur það til við sjávar- og landbúnaðarráðherra að sóttvarnareglur hjá fuglaeigendum verði hertar frá miðjum febrúar vegna útbreiðslu skæðrar fuglaflensu víða í heiminum, til dæmis í Evrópu.

Samkvæmt Matvælastofnun eru miklar líkur á að fuglaflensan berist hingað til lands og afleiðingar smits á stórum alifuglabúum eru mjög alvarlegar. Lítil hætta er talin á að smit berist í fólk en þó beinir Matvælastofnun því til fuglaeigneda að gæta smitvarna við handfjötlun á veikum og dauðum fuglum.

Fuglaflensa þar sem íslenskir fuglar hafa vetursetu

Á vef Matvælastofnunar segir að afbrigði fuglaflensuveiru með mikla meinvirkni hafi fundist í fjölmörgum villtum fuglategundum í Evrópu á síðustu mánuðum og jafnframt borist inn á alifuglabú. Það eigi til dæmis við í löndum þar sem íslenskir farfuglar hafi vetursetu, eða viðkomu á leið hingað til lands.

Því sé talin töluverð hætta á að veiran berist hingað. „Fyrstu farfuglarnir koma um og upp úr miðjum febrúar og því mikilvægt að fuglaeigendur undirbúi sig undir að verja fuglana sína eins og kostur er. Ef veiran berst inn á alifuglabú og aðra staði þar sem fuglar eru haldnir getur fjöldi fugla drepist og óhjákvæmilegt verður að aflífa alla aðra fugla á viðkomandi stöðum til að hindra útbreiðslu veirunnar,“ segir á vef Matvælastofnunar.

Fyrirskipi aflífun ef flensa greinist

Komi til þess að skæð fuglaflensa greinist í alifuglum eða öðrum fuglum í haldi hyggst Matvælastofnun leggja til við ráðherra að fyrirskipa aflífun á öllum fuglum á þeim stað til að hindra útbreiðslu veirunnar: „Á stærstu alifuglabúunum eru tugir þúsunda fugla og er því ljóst að um mjög erfiðar aðgerðir yrði að ræða og gífurlegt tjón. Það er því til mikils að vinna að tryggja smitvarnir eins og kostur er.“